Тымныы полюһа Өймөкөөн улууһун олохтоохторо байыаннай дьайыы кыттыылаахтарын өйүүллэр

Бу күннэргэ байыаннай дьайыыга кытта сылдьар дьоҥҥо анаан Өймөкөөн улууһун олохтоохторо  мааска-сиэккэни оҥорууга «Бары бииргэбит» аахсыйаҕа кытыннылар.

Бу туһунан тэрээһини тэрийбит Уус Ньаратааҕы «Металлург» култуура дьиэтин методиһа Любовь Иванова бу курдук кэпсээтэ:

— Бу суолталаах аахсыйаҕа Томтордооҕу Оҕо ускуустубатын оскуолатын, Төрүт нэһилиэгин уһуйаанын, Уус Ньаратааҕы «Пегас» оҕо айымньытын киинин уонна «Металлург» култуура дьиэтин үлэһиттэрэ көхтөөх кыттыыны ыллылар.  Сотору «Сардаана» фабрикаттан 4 куул таба  тыһын кырадаһыннарын ыытыахтаахтар. Онон танкистарга олбох тигиэхтээхпит. Наһаа наада үһү.  Сылгы сиэлинэн оҥоһуктарга маастар-кылаастары эмиэ ыытабыт. 

Төрүттээҕи оҕо уһуйаанын үлэһиттэрэ үлэлэрин быыһыгар мааска-сиэккэлэри таҥнылар. Кинилэргэ бүтэһик күннэригэр оскуола, балыыһа, олохтоох дьаһалта кэлэктииптэрэ, улахан кылаас кыргыттара көмөлөстүлэр.  Улахан сиэккэни таҥыыга матырыйаал тиийбэккэ, Төрүт нэһилиэгин олохтоохторо 26 750 солкуобайы хомуйан, харчынан кыттыстылар. Куораттан урбаанньыт Изабелла Кондакова сакааһы булан, ону тэҥэ бэйэтэ эмиэ спонсордаан матырыйаал аҕалан биэрбит. Бу үлэни тэрийбит Төрүт нэһилиэгин уһуйаанын кэлэктиибэ аахсыйа саҕаланыаҕыттан бүтүөҕэр диэри көмөлөспүт  балыыһа сиэстэрэтигэр Анфиса Кривошапкинаҕа,   матырыйааллары куораттан аҕалбыт урбаанньыттарга Изабелла Кондаковаҕа,  Борис Егоровка, бэлэм таҥыллыбыт сиэккэлэри улуус киинигэр тиэрдибит  Юрий Егоровка  улахан махталларын тиэрдэллэр.  
Ити курдук, ыраах Тымныы полюһун олохтоохторо төһө кыайарбытынан, сатыырбытынан Кыайыы туһугар байыаннай дьайыы кыттыылахтарыгар көмөлөһө олоробут.