Уус Алдан олохтоохторо тугу туруорустулар? 

Саха Өрөспүүбүлүкэтин Бырабыыталыстыбатын 2023 сыллаах үлэтин отчуота Уус Алдаҥҥа бүгүҥҥүттэн саҕаланна.

Бөлөҕү СӨ Бырабыыталыстыбатын бэрэссэдээтэлин солбуйааччы Сергей Местников салайар. Бөлөхтөр Баатаҕайынан, Суоттунан уонна Бэйдиҥэнэн арахсан үлэлииллэр. Суоттуга СӨ Ыччат дьыалаларыгар уонна социальнай коммуникацияларга миниистири солбуйааччы Надежда Мохначевская салайааччылаах бөлөх отчуокка сылдьыбыт. Бу туһунан Yakutia-Daily кэрэспэдьиэнэ Лана Ильина суруйар. Мустубут дьон ордук тырааныспар, уунан дьону таһыыга сыана, айан суолугар куттал суох буолуутун хааччыйыы, быһыты тутуу боппуруостарыгар тохтообуттар. Маны таһынан, байыаннай сулууспалаахтарга сыһыаннаах ыйытыы элбэҕинэн, байыҥкамаат бэрэстэбиитэллэрэ кыттыахтаахтар этэ диэн санааларын биллэрбиттэр. Маны сэргэ, күөх төлөн, оптоволокно ситимэ киириитин ыйыталаспыттар.

Оттон Тумул олохтоохторун 2025 сылга үлэҕэ киириэхтээх саҥа оскуола боппуруоһа долгутарын эппиттэр. Болдьоммут кэмигэр түмүктэниэ дуо диэн ыйыппыттар. Маны сэргэ успуорт саалатын тутуу туһунан боппуруоһу көтөхпүттэр. Маны сэргэ, киин ититэр ситим, үүккэ субсидия, инбэлииттэри дьиэнэн хааччыйыы туһунан ыйытыылар киирбиттэр. Ордук сытыы боппуруоһунан педагогтар уонна мэдиссиинэ үлэһиттэрэ тиийбэттэрэ буолбут.

Лана Ильина хаартыскаҕа түһэриитэ