Владимир Прокопьев: «Арассыыйаны ким даҕаны, хаһан даҕаны кыайбатаҕа, кыайыа да суоҕа!»

Бу уустук кэмнэргэ Сахабыт сирэ Арассыыйаны кытта бииргэ буолан, анал байыаннай дьайыыларга барааччылары тэрийэн ыытыыга, кинилэр дьиэ кэргэннэригэр өйөбүл, тирэх буолууга элбэх өрүттээх үлэни ыыта олорор. Онно былаас эрэ буолбакка, миэстэтигэр дьон-сэргэ, үлэ кэлэктииптэрэ, биирдиилээн исписэлиистэр ким тугу сатыырынан, билэринэн-көрөрүнэн, кыайарынан-хоторунан көмө, тирэх буолаллар.

Д.П. Коркин аатынан Чурапчытааҕы Олимпийскай резервэ спортивнай оскуолатын кэлэктиибэ маннык наадалаах үлэлэргэ тус кылаатын киллэрсэ сылдьарын туһунан оскуола историяҕа уонна обществознаниеҕа учуутала Владимир Прокопьев кэпсиир.
— Биһиги оскуола үлэһиттэрэ анал байыаннай эпэрээссийэҕэ барааччыларга, кинилэр дьиэ кэргэннэригэр өйөбүлү оҥорууга кытта, көмөлөһө сылдьабыт. Ол курдук оскуола үлэһиттэрэ араас сылаас наскылартан саҕалаан байыаннай усулуобуйаҕа туттарга сөптөөҕү хомуйбуппут. Биһиги кэлэктииппит өрөспүүбүлүкэ Идэлээх сойуустарын ыҥырыытын өйөөн, Саха сирин бырааттыы куоратын счетугар харчы хомуйан ыытта.