Үөрэнээччилэр Карина Чикитованы көрдүүргэ кыттыбыт быыһааччыны кытары көрүстүлэр

Саха сиригэр икки нэдиэлэ курдук ойуурга муна сылдьыбыт 4 сааһын туола илик Карина Чикитова дьылҕатын элбэх киһи интэриэһиргиир. Кини тыыннаах көстөрүн туһугар дьон үҥэн-сүктэн көрдөспүтэ, элбэх киһи көрдөспүтэ.

Өлүөхүмэ улууһун кыракый Олом сэлиэнньэтэ, кыра оҕо сүтэн, биирдэ эмискэ биллибитэ. Сүппүтэ 12-с күнүгэр кыысчаан тыыннаах көстөн, аан дойду барыта долгуйа-аймана түспүтэ. 10 сыл буолан баран, бу ураты түгэн туһунан уус-уран киинэ уһуллан таҕыста уонна аан дйоду үрдүнэн ситиһиилээхтик көстө сылдьар. Карина Чикитова тыйыс усулуобуйалаах Саха сирин дьоно-сэргэтэ тулҕадыйбат эр санаалаахтарын, олоххо тардыһыылаахтарын, билиҥҥи үүнэн иһэр ыччакка, улаатан эрэр оҕолорго өйдөтөр, иитэр тыыннаах холобурунан буолар.

Бу күннэргэ Дьокуускай куорат В.П. Ларионов аатынан физико-тиэхиньиичэскэй лиссиэйин үөрэнээччилэрэ Саха Өрөспүүбүлүкэтин күнүн тэрээһинин чэрчитинэн Карина Чикитованы көрдүүргэ кыттыбыт быыһааччыны кытары көрүстүлэр.

5 «а» кылаас үөрэнээччилэрэ (кыл. салайааччыта Елена Васильевна Антонова) аһаҕас уруокка СӨ Быыһыыр сулууспатын быһааччытын Трофим Иванову кытары көрүстүлэр. Трофим Васильевич – бастакы кылаастаах быыһааччы, Быыһыыр сулууспаҕа 2004 сылтан үлэлиир. Кини элбэх көрдүүр, быыһыыр тэрээһиннэргэ кыттыбыта, ону тэҥэ Карина Чикитованы көрдүүргэ кыттыбыт быыһааччы буолар.

Оҕолор бу күн быыһааччыны кытары олус интэриэһиргээн кэпсэттилэр, элбэх ыйытыылары биэрдилэр. Бу көрсүһүү хорсун кыыс Карина Чикитова туһунан киинэ көстө сылдьар кэмигэр ураты улахан суолталаах.