Үгүлээттэр байыастарга балык ыытыахтара

Кулун тутар 21 күнүгэр Бүлүү улууһуттан байыаннай дьайыыга сылдьар уолаттары көрсө, гуманитарнай көмө илдьэ дэлэгээссийэ барыаҕа.  Дэлэгээссийэни улуус баһылыгын солбуйааччы Александр Анатольевич Прокопьев салайыаҕа.

“Үгүлээт дьоно-сэргэтэ балык хомуйан, ыыһаммыт балыгы  ыытыахтаахпыт. Нэһилиэк дьаһалтатын өттүттэн бу боппуруоска Байрон Иванов  эппиэтинэстээҕинэн ананан, сүүрэ-көтө, тэрийэ сылдьар. Бэҕэһээ эр дьоммутун ыҥыран, субуотунньуктаан балык астааһыныгар Василий Яковлев, Николай Алексеев, Михаил Спиридонов кэлэн көмөлөстүлэр, балыктары тууһаан бэлэмнээтилэр. Ону тэҥэ  дьаһалтаттан кэрэ аҥаардарбыт Елена Иванова, Надежда Спиридонова эмиэ көмөлөһөн, дьиэни-уоту сууйдулар. Бүгүн  балыктарын куурдан, ыйаан   баран,  сороҕун  ыыһаан бэлэмниэхтээхтэр уонна  Бүлүүгэ киллэрэн туттараллар. Ону таһынан “Сайдам” КСК  үлэһиттэрэ дириэктэр С Е.Яковлева көҕүлээһининэн маскировочнай сиэккэ оҥоһуллубутун ыытыахтаахпыт. Оскуолабыт оҕолоро эрдэ блиндажка уматыллар чүмэчини оҥорон ыыппыттара, — диэтэ Үгүлээт нэһилиэгин баһылыга Октябрь Лукин.