”Үлэ кыбартаалыгар” креативнай идэлэр мастарыскыайдара аһылынна

Дьокуускайга “Үлэ кыбартаала” креативнай кластерга аныгы идэлэргэ туһуламмыт Synergy Creative Hub саҥа мастарыскыай аһылынна.

Манна оскуола оҕолоругар компүүтэрдээх кылаастарга, лабораторияҕа уонна лекторийга анимация уонна дизайн хайысхаларынан куурустар ыытыллыахтара.

Сайыҥҥы кэмҥэ мастарыскыайга анимационнай киинэ сценарийыгар уонна режиссуратыгар үс ыйдаах куурустар үлэлиэхтэрэ, Motion Design, мультипликация, графическай дизайн төрүттэригэр, 3D-моделированиеҕа,  бырагыраама оҥоруутугар үлэлэһиэхтэрэ.

— Манна ыччаппыт талаанын арыйан, саҥа идэлэргэ үөрэтэр былаһааккалар элбээн иһэллэрэ кэрэхсэбиллээх. Сотору кэминэн бу, биллэн турар, кэскиллээх түмүктээх буолуоҕа. Кэлин Саха сирин креативнай индустриятын сайыннарар анал исписэлиистэр баар буолуохтара, — диэн СӨ Бырабыыталыстыбатын Бэрэссэдээтэлин солбуйааччы Анатолий Семенов мастарыскыай аһыллыытыгар санаатын эттэ.

Үөрэх түмүгүнэн «Синергия» университекка сыыппара идэлэрин кэллиэһигэр киирэргэ эбии баалы эбэтэр үөрэххэ киириигэ туттуллар сэртипикээттэри биэриэхтэрэ.