Абыраллаах чэпчэтиилээх билиэттэр

Бу аҕыйах хонуктааҕыта биир билэр дьахтарым Москваҕа диэри  баара-суоҕа кэлэ-бара 20 тыһ. солкуобайга авиабилиэт атыыласпытын туһунан кэпсээбитэ. Ону итэҕэйбэккэ, “Авиасейлс” саайтка киирэн көрбүтүм, кырдьык, Уһук Илин олохтоохторугар чэпчэтиилээх билиэттэр атыыга  тахсыбыттар эбит.

Путин туох диэн хоруйдаата?

Биһиги киин сиртэн ыраах олорор буоламмыт, ханна эрэ соҕуруу айаннаары гыннахпытына чэпчэки сыаналаах би­­лиэт көрдүүр мучумааныгар түһэбит. Салгын тырааныспара, оннооҕор пуойас кытта сылдьар эрээри, билиэт сыаната “тос” курдук. Аҕыйах сылтан бэттэх, Уһук Илин олохтоох­торугар барыларыгар анаан чэпчэтиилээх тарыыптар бырагыраамалара оҥоһуллан, үгүс киһи сылга биирдэ-иккитэ арыый удамыр сыана­лаах билиэтинэн туһанар кыахтанна.

Быйыл чэпчэтилээх билиэттэр атыыга эрдэ бүтэн баран, сыл бүтүүтэ “Якутия” авиахампаанньа субсидиялаах билиэттэри атыыга таһаарда. Кэлэр сылга туһааннаах бырагыраама салгыы үлэлиэ дуо диэн ыйытыы үгүс киһини долгутан, бу күннэргэ туһааннаах ыйытыы хоруйун дойду Аҕа баһылыга Владимир Путин пресс-кэмпириэнсийэтин кэмигэр иһиттибит.  Ол курдук, пресс-кэмпириэнсийэ  кэмигэр Уһук Илин Федеральнай уокуруктан «Колыма-плюс» ханаал суруналыыһа Александр Орлов субсидиялаах билиэттэр тустарынан ыйытыы биэрбитэ.  Онуоха Бэрэсидьиэн  2024 Уһук Илиҥҥэ көтүүгэ экэниэм-кылааска  кэлим тарыыптар салгыы баар буолуохтаахтарын туһунан хардарбыта.

Чэпчэтиинэн туһанар гражданнарга

Бу күннэргэ Салгын тырааныспарын федеральнай ааҕыныстыбата (Росавиация) 2024 сылга субсидиянан туһанар авиахампаанньалар испии­һэктэрин уонна хайысхаларын таһаарда. Чэпчэтиилээх тарыыбынан 23-гэр диэри саас­таах эдэр дьон, 55-рин ааспыт дьахталлар, 60-тан тахсыбыт эр дьон, I группалаах саас­таах инбэлииттэр уонна кинилэри арыаллааччылар, бары группалаах инбэлиит оҕолор уонна кинилэри арыаллааччылар, оҕо саастарыттан II, биитэр III группалаах инбэлииттэр, элбэх оҕолоох ыаллар  туһаналлар.

Ол курдук “Якутия” АХ Дьокуускайтан Владивосток, Екатеринбург, Иркутскай, Красноярскай, Минеральные Воды, Омскай, Новосибирскай, Санкт-Петербург, Сочи, Южно-Сахалинскай куораттарга итиэннэ Нерюнгриттэн  Москваҕа, Новосибирскайга көтүүгэ субсидия көрүллүбүт. Маны таһынан  «АЛРОСА»  АХ  Мииринэйтэн Москваҕа, Санкт-Петербург куоракка, Новосибирскайга, Иркутскайга итиэннэ Полярнайтан Москваҕа уонна  Новосибирскайга көтүүгэ.  «Аэрофлот» авиахам­паанньа чэпчэтиинэн туһанар категория гражданнарыгар чэпчэтиилээх билиэттэри Дьокуускайтан Москваҕа диэри атыылыаҕа.

Уһук Илин олохтоохторугар

“Аэрофлот” ахсынньы 14 күнүттэн Уһук Илин олохтоохторугар 2024 сыллааҕы көтүүгэ субсидиялаах билиэттэри атыылаан саҕалаата.  Анал тарыыптар “Аэрофлот” иһинэн үлэлиир  «Россия»  уонна  «Аврора» авиахампаанньаларга эмиэ  SU куодунан экэнэмиичэскэй кылааска атыыланаллар. Билиэти авиакассаҕа да барбакка, саайт нөҥүө онлайн атыылаһыахха сөп.

Холобур, Дьокуускайтан Москваҕа диэри билиэт сыаната улахан дьоҥҥо 9 200 солк., оҕолорго 5 250 солк., Владивостоктан Москваҕа диэри улахан дьоҥҥо  10 200 солк., оҕолорго 5 550 солк. быһыллыбыт. Уопсайа алта хайысханан чэпчэтиилээх билиэттэр атыыланаллар.

Оттон чэпчэтиинэн туһанар  гражданнарга  Дьокуускайтан Москваҕа диэри сыана өссө чэпчэки. Улахан дьоҥҥо 7 000 солк., оҕолорго 5 250 солк. Уопсайа субсидия 18 хайысханан олохтоммут.

“Якутия” АХ:  чэпчэтиинэн туһанар гражданнарга (солк.)

Эбии үбүлээһин көрүлүннэ

Дойду премьер-миниистирэ Михаил Мишустин бу күннэргэ Уһук Илин нэһилиэнньэлээх пууннарыгар авиакөтүүнү субсидиялааһыҥҥа  федеральнай бүддьүөттэн эбии 4,5 млрд солк. үп-харчы көрүллүбүтүн туһунан иһитиннэрдэ.  “Бу үп авиа­хампаанньалар субсидиялаах көтүүлэри оҥорууга ороскуоттарын толуйарга ыытыллар. Онон, туһааннаах сыалга уопсайа 2023 сылга 10 млрд солк. тахса үп көрүлүннэ”, – диэн премьер-миниистир бэлиэтээтэ.

Санатан эттэххэ, субсидиялааһын бырагыраамата 2018 сылтан үлэлиир. 79 хайысханы хабар, ол иһигэр Москваттан, Санкт-Петербургтан, Сочиттан, Омскайтан, Новосибирскайтан, Екатеринбургтан уонна да атын куораттартан Уһук Илиҥҥэ көтүүнү.

Билигин Дьокуускайтан киин куораттарга көтүүгэ көннөрү билиэттэр бас быстар сыаналаахтар. Холобур, Москваҕа диэри ахсынньы 25 күнүгэр S7 Airlines АХ 44 тыһ. солк., “Якутия” АХ 24 тыһ. солк. билиэттэри атыылыыр. Бу аҥаардастыы биир эрэ хайысхата. Кэлэ-бара икки бүк ыарахан. Онон, Уһук Илин олохтоохторо бары чэпчэтиилээх билиэтинэн туһанар кыахтанан, айанныылларыгар улаханнык ороскуотурбат буоллулар.