Хаартыска: «ВИС» бөлөх пресс-сулууспата.
Өлүөнэ өрүскэ муус туруон иннинэ муоста тутулла турар былаһааккатыгар өрүс флотун навигацията түмүктэннэ. Ааспыт сезон устата 20-чэ өрүс суудуната ууга ыытыллар уустук технологическай үлэлэри хааччыйда диэн «ВИС» бөлөх иһитиннэрдэ.
Сүүнэ тутуу «ВИС» бөлөх уонна Саха сирин Бырабыыталыстыбатын концессионнай сөбүлэҥнэринэн, бүддьүөтү таһынан үбү-харчыны тардыынан ыытыллар. Бырайыак Арассыыйа Бэрэсидьиэнэ Владимир Путин сорудаҕынан «Олох-дьаһах инфраструктурата» национальнай бырайыакка киирбитэ.
Саха сирин Ил Дархана Айсен Николаев бэлиэтииринэн, эбийиэк үлэҕэ киирдэҕинэ, өрөспүүбүлүкэ устуоруйата күргэ тутуллуон «иннинээҕи» уонна «кэннинээҕи» кэмнэргэ арахсыаҕа. Билигин өрүһү туоруур муоста суоҕуттан үс федеральнай, биэс эрэгийиэнээҕи суол, норуоттар икки ардыларынааҕы аэропуорт, өрүс пуорда уонна тимир суол бэйэ-бэйэлэрин кытта биир ситимэ суох сыталлар. Олор холбостохторуна, Саха сирин уопсай эргийиэннээҕи бородууктата 2 бырыһыан үрдүөҕэ.
«Бу үлэ матырыйаалы, табаары таһыыга, саҥа сирдэри баһылааһыҥҥа, тутууга уонна сыананы түһэриигэ сүүнэ хардыынан буолуоҕа. Саха сирин дьонун олоҕун хаачыстыбата отой атын таһымҥа тахсыаҕа», — диэн Айсен Николаев тоһоҕолоон эттэ.
Муостаны тутууга өрүс логистиката ураты суолталаах. Кылгас навигация, уу күүстээх сүүрүүгэ уонна гидрологическай уустук усулуобуйалар тутааччылартан, суудуна хаһаайыннарыттан уонна тэрилтэлэртэн чопчу былааннаах, биир сомоҕо үлэни ирдииллэр.
Быйылгы саамай уустук соругунан өрүс ортотунааҕы тирэхтэр фундаменнарын оҥорорго аналлаах ууга устар коффердамнары туруоруу буолла. Арассыыйаҕа бастакытын 2200 уонна 4000 туонна ыйааһыннаах сүүнэ конструкциялары ууга түһэрэн, ортоку уонна уҥа пилоннар тутуллар сирдэригэр уһуннаран аҕаллылар. Бу эппиэтинэстээх үлэҕэ хас да буксир, ЛОРП (Өлүөнэтээҕи холбоһуктаах өрүс пароходствота) тягачтара, «Дьокуускай» судоходнай хампаанньа «Нилов» тягача, «Морбаза» тэрилтэ уонна «ВИС» бөлөх бэйэтин флота үлэлээтилэр.
Маннык эпэрээссийэлэр өрүс түгэҕин бэлэмниири ирдииллэр. «Өлүөнэ бассейнын дьаһалтата» өрүс түгэҕин сканердаан, икки пилон турар сириттэн 500 тыһыынча кубометр буору хостоон, ууну дириҥэттэ. Бу үлэ хаҥас кытылга эмиэ салҕанар, онтон эһиил үһүс коффердамы ууга түһэриэхтэрэ.
Саха Өрөспүүбүлүкэтин Ил Дарханын уонна Бырабыыталыстыбатын пресс-сулууспата.
Сиһилии: https://www.sakha.gov.ru/news/68153
Бултаммыт кыыл олус улахан буолан, тыаттан таһаарарга тыраахтары туһаналларыгар тиийбиттэр. Оттон эһэни астыырга биир сууккаттан…
Өрөспүүбүлүкэ нэһилиэнньэлээх пууннара кыһыҥҥы суол аһыллыар диэри оттук-энергетика өттүнэн толору хааччылыннылар. Ол туһунан Ил Дархан…
СӨ Үрдүкү Суута дьоҥҥо юридическай көмө оҥоробун диэн албыннаан харчы ылбыт юрист-урбаанньыт дьыалатын көрдө. Ол…
Хас биирдии сир, дойду бэйэтэ ураты тыыннаах. Архитектор сүрүн соруга — ол тыыны таба көрөн,…
Ил Дархан Айсен Николаев кыттыылаах «Быһа лииньийэ» ааспыта биир ый буолла. Ол кэм иһигэр өрөспүүбүлүкэ…
Хоту сирин отонноругар — моонньоҕоҥҥо, сугуҥҥа уонна уулаах отоҥҥо — баар эттиктэр килиэккэ кырдьыытын бытаардар…