Айсен Николаев «Саха сирин географията» үөрэх комплексын оҥорорго сорудахтаата

Саха сиригэр «Саха сирин географията» диэн саҥа үөрэх комплексын оҥоруохтара. Онно үөрэх бырагыраамата, үөрэх кинигэтэ, атлас, контурнай каарталар уонна сыыппара матырыйааллара киириэхтэрэ. Өрөспүүбүлүкэ Ил Дархана Айсен Николаев Арассыыйатааҕы география уопсастыбатын  эрэгийиэннээҕи салаатын попечителлэрин сэбиэтин мунньаҕын түмүгүнэн маннык сорудаҕы биэрдэ. Саха сиринээҕи Арктиканы чинчийэр билим киинин дириэктэрэ, география билимин дуоктара Михаил Присяжный иһитиннэрбитинэн, үөрэх матырыйаалларын саҥардыы наадата хаһааҥҥыттан эрэ тирээбитэ.

«Кэнники чиэппэр үйэ тухары Саха сирэ биллэрдик уларыйда. Экэниэмикэ саҥа салаалара сайдаллар, инфраструктура бөдөҥ бырайыактара олоххо киирэллэр, туризм саҥа маршруттара баар буоллулар. Онуоха «Саха сирин географията» үөрэх кинигэтэ 2004 сыллаахха бэчээттэнэн тахсыбыта уонна 2013 сыллаахха хос бэчээттэммитэ, оттон өрөспүүбүлүкэ географиятын атлаһа 2000 сыллаахха күн сирин көрбүтэ. Бу матырыйааллар эрэгийиэн билиҥҥи туругун билигин толору көрдөрбөттөр. Онон үөрэх кинигэтин уонна атлаһы эрэ буолбакка, мэлдьи саҥардылла турар кыахтаах сыыппара матырыйаалларын эмиэ хабар саҥа үөрэх-методика комплексын оҥорорго наада», — диэн Михаил Присяжный бэлиэтээтэ.

Кини этэринэн, Ил Дархан сорудаҕынан Саха сиринээҕи Үөрэх уонна билим министиэристибэтин иһинэн үлэ бөлөҕө тэриллэр. Онно үөрэх уонна билим тэрилтэлэрин бэрэстэбиитэллэрэ, кыраайы үөрэтээччилэр уонна Арассыыйатааҕы география уопсастыбатын чилиэннэрэ киириэхтэрэ. Саҥа комплекска үөрэх бырагыраамата, үөрэх кинигэтэ, контурнай каарталар кэмпилиэктэрин кытта география атлаһа, ону тэҥэ Хотугулуу-Илиҥҥи федеральнай университет геопорталыгар атлас сыыппаранан игирэтэ киириэхтэрэ. Сыыппара барыла өрөспүүбүлүкэ нэһилиэнньэтин, экэниэмикэтин, инфраструктуратын уонна айылҕатын эйгэтин туһунан иһитиннэриини мэлдьи саҥардарга кыах биэриэҕэ. Үөрэх комплексын эспэртииһэтигэр  М.К. Аммосов аатынан Хотугулуу-Илиҥҥи федеральнай университеты, Саха сиринээҕи Арктиканы чинчийэр билим киинин, Өрөспүүбүлүкэ Билим академиятын, ону тэҥэ география учууталларын методикаҕа холбоһуктарын кытыннарарга сүбэлэнэр.

Үөрэх матырыйаалларын бэлэмнииргэ өрөспүүбүлүкэ министиэристибэлэрэ, биэдэмистибэлэрэ уонна тэрилтэлэрэ оҥорооччуларга нэһилиэнньэ, экэниэмикэ, социальнай инфраструктура, тырааныспар, экология уонна туризм туһунан актуальнай иһитиннэриилэри, ону тэҥэ статистика дааннайдарын уонна хаартыскалары биэриэхтэрэ. Педагогтар квалификацияларын үрдэтиигэ дьаһаллар эмиэ көрүлүннүлэр. Үөрэҕириини сайыннарар уонна квалификацияны үрдэтэр институт географияны атын биридимиэттэри кытта тэҥҥэ үөрэтэр учууталларга, ордук кыра комплектаах оскуолаларга, «Элбэх профиллаах учуутал» диэн куурустары ыытарын кэҥэтиэҕэ.