Хаартыска sakha.gov.ru
Күндү доҕоттор! Эһигини Арассыыйаҕа Суол хаһаайыстыбатын үлэһиттэрин күнүнэн ис сүрэхпиттэн эҕэрдэлиибин!
Бу олус суолталаах эйгэ үлэтиттэн тырааныспар инфраструктуратын сайдыыта, сирдэр-улуустар бэйэ-бэйэлэрин кытта ситимнэрэ, логистика бигэ туруга, стратегическай суолталаах таһаҕаһы тиэрдии, ону тэҥэ Саха сирин бары олохтоохторун олоҕун хаачыстыбата уонна айанныырга табыгастаах буолуута тутулуктаах.
Өрөспүүбүлүкэ суолдьуттарын тиһэх сылларга үлэлэрин түмүгэ үөрдэр уонна сөхтөрөр. 2019 сыл саҕаланыытыгар эрэгийиэн суолларын 30,6%-на уонна Дьокуускай куорат уулуссаларын, суолларын ситимин 31,7%-на нуормаҕа эппиэттиир туруктааҕа. Оттон 2025 сыл бүтүүтүгэр нуормаҕа эппиэттиир эрэгийиэн суолларын бырыһыана 63,4%-ҥа, куорат агломерациятыгар — 85%-ҥа тиийдэ. 2026 сыл саҕаланыытыгар 3200 килэмиэтиртэн тахса суол уонна 59 муоста тутулунна уонна саҥардылынна.
Суол хаһаайыстыбатын үлэһиттэрэ Саха сирин олохтоохторо сыл төгүрүччү айанныыр кыахтаах буолалларын туһугар үлэлэрин салгыыллар.
Биһиги уопсай үлэбит саамай сүрүн сыалынан Арассыыйа Бэрэсидьиэнэ Владимир Путин сорудаҕынан тутулла турар Өлүөнэтээҕи муоста буолар. Бу муоста үлэҕэ киириитэ өрөспүүбүлүкэҕэ уонна бүтүн Арассыыйаҕа устуоруйаҕа киирэр улахан суолталаах түгэнинэн буолуоҕа. Муоста федеральнай суолталаах үс уонна эрэгийиэннээҕи биэс суолу, Амур-Дьокуускай тимир суолун магистралын, өрүс пуордун уонна норуоттар икки ардыларынааҕы аэропуорду бииргэ ситимниэҕэ. Өлүөнэтээҕи муоста — тырааныспар эйгэтигэр улахан сайдыы эрэ буолбатах, бу өрөспүүбүлүкэбит саҥа таһымҥа тахсарын бэлиэтэ.
Арассыыйа саамай улахан эрэгийиэнэ — Саха сирин логистикатын ситимэ — бу өрөспүүбүлүкэ суол хаһаайыстыбатын исписэлиистэрин бэриниилээх үлэлэрин түмүгэ. Эһиги саамай тымныы, ыарахан айылҕа уонна уустук тиэхиньикэ усулуобуйатыгар үлэлииргитинэн, мэлдьи хорсун быһыыны, оттон ардыгар дьиҥнээх дьоруойдуу быһыыны көрдөрөҕүт. Эһиги үрдүк таһымнаах үлэҕит уонна идэҕитигэр бэриниилээх буолуугут Саха сирин олохтоохторун дириҥ билиниилэрин уонна истиҥ махталларын ылыан ылла.
Бары былааннаммыт бырайыактар болдьоҕор уонна үрдүк хаачыстыбалаахтык олоххо киириэхтэрэ диэн эрэнэбин. Саха сирин суол хаһаайыстыбатын бары үлэһиттэригэр, эйгэ бэтэрээннэригэр чэгиэн доруобуйаны, уостубат уох-эрчими уонна этэҥҥэ буолууну баҕарабын!
Саха Өрөспүүбүлүкэтин Ил Дархана Айсен Николаев
Өрөспүүбүлүкэ нэһилиэнньэлээх пууннара массыына кыһыҥҥы суола аһыллыар диэри ирдэнэр кээмэйдээх оттук-энэргэтиическэй саппааһынан олоччу хааччылыннылар. Бу…
«Күн бүгүн эрэгийиэн иһинээҕи көтүүлэри үбүлээһин өрөспүүбүлүкэ бүддьүөтүн суотугар эрэ ыытыллар. Бу сыалга 250 мөлүйүөн…
Арассыыйаҕа массыына атыылаһарга чэпчэтиилээх кирэдьииттээһин хас даҕаны судаарыстыбаннай бырагыраама үлэлиир. Ону туһанан саҥа массыынаны атыылаһыахха…
Бу күннэргэ Горнай улууһун Бэрдьигэстээх сэлиэнньэтин ыччаттара нэһилиэк сэбиэтэ тэриллибит күнүн бэлиэтээтилэр. Бу туһунан Бэрдьигэстээх…
Сэтинньи 4-6 күннэригэр Дьокуускайга Сомоҕолоһуу күнүгэр аналлаах норуот уус-уран оҥоһуктарыгар босхо маастар-кылаастары ыытыахтара. Тэрээһини «Мин…
Өлүөнэ муостатын тутар былаһааккаҕа өрүс флотун муус туруон иннинээҕи үлэтэ түмүктэннэ. Ааспыт сезон устата 20-чэ…