Александр Атласов — Саха сирин бастыҥ мэхэньисээтэрэ

Дьокуускайдааҕы тыа хаһаайыстыбатын тиэхиньикумугар сэргэх күрэхтэһии буолла. Бүтүн Арассыыйатааҕы «Идэҕэ бастыҥ»  куонкурус «Мэхэньисээтэр» номинациятыгар эрэгийиэннээҕи түһүмэх түмүктэннэ. 

Кыайыылааҕынан сири мелиорациялааһын уонна тыа хаһаайыстыбатын уунан хааччыйыы управлениетыттан Александр Атласов буолла. Кини куонкурус федеральнай түһүмэҕэр Саха сирин чиэһин көмүскүөҕэ.

Күөн күрэс РФ Бэрэсидьиэнэ В.Путин көҕүлээбит «Каадырдар» национальнай бырайыак иитинэн ыытылынна. Бу агробырамыысыланнай комплекс бастыҥ исписэлиистэрин быһаарыыга уонна өйөөһүҥҥэ, оробуочай идэлэри өрө көтөҕүүгэ уонна бастыҥ үөрүйэҕи атастаһыыга туһуланар.

Иккис бочуоттаах миэстэни Дамир Дмитриев, үсүһү — Семён Татаринов ыллылар. Кинилэр иккиэн Хаҥалас улууһуттан «Хачыкаат» ТХПК кытыннылар. Дьүүллүүр сүбэ кыттааччылар бу хайысхаҕа билиилэрин-көрүүлэрин уонна үлэҕэ бэлэмнэрин таһыма үрдүгүн бэлиэтээтэ.

—Манна тыа хаһаайыстыбатын туруктаах буолуутун, сайдыытын хааччыйар туһугар үлэлэһэр профессионаллар күрэхтэһэллэр. Чуолаан кинилэр билиилэриттэн, үөрүйэхтэриттэн уонна эппиэтинэстэриттэн салаа үлэтин көдьүүһэ тутулуктаах. Маннык куонкурустар маастарыстыбаны көрдөрөр эрэ буолбакка, уопут атастаһар, агротехнологияҕа аныгы ньымалары билэр уонна идэҕэ бэлэмнэнии таһымын үрдэтэргэ кыаҕы биэрэллэр. Чуолаан маннык тэрээһиннэргэ эдэр каадырдарга холобур буолар, салаа сайдыытыгар кылааттарын киллэрэр талааннаах исписэлиистэр арыллаллар, өйөбүлү ылаллар, — диэн СӨ ыччат дьыалатын уонна социальнай алтыһыытын миниистирэ Петр Шамаев эттэ.

 

Бастакы күн күрэстэһээччилэр тест 50 ыйытыытыгар хоруйдаатылар, бырайыактарын көмүскээтилэр. Иккис үн быраактыкаҕа ананна. Мэхэньисээтэрдэр билиилэрин-көрүүлэрин, сатабылларын көрдөрдүлэр.

Тыа хаһаайыстыбатын миниистирин солбуйааччы Сахаяна Павлова тэрээһини уонна кыттааччылар таһымнарын үрдүктүк сыаналаата.

—Бу исписэлиистэр үөрүйэх ыланнар квалификацияларын үрдэтэллэригэр бэртээхэй тирэх.  Дебют да буоллар, күрэхтэһии таһыма олус үрдүк буолан, хамыыһыйа уонна тиэхиньикум баазата үрдүк сыанабылы ыллылар. «Хачыкаат» ТХПК салайааччыта Роман Куприяновка үлэһиттэригэр өйөбүлүн иһин махтанабын. Күрэскэ сылдьан хамаанда иһин күүскэ ыалдьан биэрдэ. Атын хаһаайыстыбалары эмиэ исписэлиистэрин маннык күрэхтэһиилэргэ ыыталларыгар сүбэлиибин, — диэтэ Сахаяна Павлова.

—СӨ Ил Дархана Айсен Николаев ыйааҕынан биһиги иннибитигэр бородууксуйаны оҥорон таһаарыыны улаатыннарар сыал-сорук турар. Мэхэньисээтэрдэр, агрономнар үлэлэрэ суох онно сатаммаппыт — кинилэр профессионализмнара бүтүн агробырамыысыланнай комплекс ситиһиитин мэктиэтинэн буолар. 2025 сыл көрдөрүү түмүгүнэн 58 тыһ. гектарга тиийдибит, ити курдук каадырдар көмөлөрүнэн үүнүү үрдүө диэн эрэллээхпин. Бу күрэхтэһии улахан кэскиллээх уонна Сахабыт сиригэр үтүө үгэс буолуоҕа диэн эрэнэбин, — диэн кини тоһоҕолоон бэлиэтээтэ.

Күөн күрэс федеральнай түһүмэҕэ Тамбов уобалаһыгар балаҕан ыйын 29 — алтынньы 1 күннэригэр ыытыллар. Бу туһунан СӨ Ил Дарханын уонна Бырабыыталыстыбатын пресс-сулууспата иһитиннэрэр.

Сиһилии: https://www.sakha.gov.ru/news/54190

Хаартыскалар: тыа хаһаайыстыбатын министиэристибэтиттэн