Александр Подголов: Түмсүүлээх буолуоҕуҥ

Ил Түмэн Бэрэссэдээтэлин солбуйааччы, байыаннай сулууспалаахтар, бойобуой дьайыылар бэтэрээннэрин дьыалаларыгар, патриотическай иитиигэ уонна уопсастыбаннай тэрилтэлэргэ сис кэмитиэт бэрэссэдээтэлэ Александр Подголов билигин Ил Түмэн дэлэгээссийэтин кытта үлэтинэн командировкаҕа сылдьар.

— Биһиги Ростовка сырыттыбыт. Госпиталларга байыастары көрүстүбүт. Билигин Крымҥа бииргэ үлэлииргэ сөбүлэһии түһэрсиэхтээхпит. Бэҕэһээ киэһээ хойутуу Москваҕа Красногорскайга теракт буолбутун туһунан хомолтолоох сонуну иһиттибит.

Туох диэхпин да билбэппин. Бу кэнсиэр көрө кэлбит дьону ытыалааһын диэн иэдээннээх быһыы.

Билигин маннык иэдээннээх быһыыны оҥорбут дьон тугу оҥорбуттарыгар эппиэттиэхтээхтэр. Туораттан киксэриигэ киирэн биэрэр табыллыбат.

Биһиги түмсүүлээх, сомоҕолоһуулаах буолуохтаахпыт. Бу биһиги Ийэ дойдубутугар билигин ордук наада.