Бе-200 амфибия сөмөлүөт Бүлүү улууһугар туһанылынна

Салгын суудуната Бүлүү улууһун Кыһыл-Сыыр сэлиэнньэтиттэн чугас эргин баар ойуур баһаарын умуоруорууга туһанылынна. Бу туһунан бастакы вице-премьер Дмитрий Садовников иһитиннэрдэ.

«Нэһилиэнньэҕэ куттал суох. Миэстэтигэр 56 киһи, 20-тэн тахса идэлээх баһаарынайдар үлэлииллэр», — диэн Бырабыыталыстыба бастакы солбуйааччыта иһитиннэрдэ.

Бүгүн Бе-200 амфибия көтөр аал атын сиргэ, сэлиэнньэттэн 25 км тэйиччи сытар уоту бохсууга үлэлээтэ. Онно  40 туонна уу быраҕылынна. Баһаары умуруорууга 27 киһи үлэлиир. Дмитрий Садовников этэринэн, уопсайынан Саха сиригэр нэһилиэнньэлээх пууннартан чугас 13 ойуур баһаара турбута биллэр.

«Судургута суох балаһыанньа билигин Өлүөхүмэ улууһун Дабаан сэлиэнньэтиттэн чугас ойуур баһаара турбута бэлиэтэнэр, миэстэтигэр 140-тан тахса киһи үлэлиир. Быыһыыр сулууспа үлэһиттэрэ кэллилэр. Бөртөлүөт туһаныллар», — диэн  кини иһитиннэрдэ.

От ыйын 6 күнүн киэһэтигэр СӨ Экологияҕа, айылҕаны туһаныыга уонна ойуур хаһаайыстыбатыгар миниистири солбуйааччы Коноплев Андрей иһитиннэриитинэн, Саха сиригэр 302 тыһ. га иэннээх сиргэ 107 ойуур баһаара турбут, мантан 18 тыһ. га иэннээх сиргэ 11 ойуур баһаара тохтотуллубут.