Аммаҕа «Ийэ тыл» пуорум ыытылынна

Амма улууһугар муус устар 14 күнүгэр «Ийэ тыл» бастакы пуорум буолла.

Күн бастакы аҥаарыгар түһүлгэлэринэн арахсан, бары хайысханы хабан, күүстээх үлэ ыытылынна. Эбиэт кэннэ Ф.Потапов аатынан Норуот айымньытын дьиэтэ сахалыы таҥныбыт, үөрбүт-көппүт дьонунан туолла. Киирэр ааҥҥа кыттааччылары  арыылаах алаадьынан, саламанан, кырыымпа дорҕоонунан айхаллыы көрүстүлэр.

Степан Кузьмин, Амма улууһун баһылыга:

— Бүгүн араас былаһааккаларынан элбэх хайысхаларга сүрдээх үчүгэй кэпсэтиилэр буоллулар. Ыччакка, оҕолорбутугар ийэ тылы иҥэрии биһиги, төрөппүттэр, быһаччы эбээһинэспит буолар. Үтүө холобуру бэйэбит көрдөрүөхтээхпит. Билиҥҥи тэтимнээх кэмҥэ тылбытын, култуурабытын, историябытын дириҥник чинчийэн билиэхтээхпит, кэнчээри ыччаппытыгар тиэрдиэхтээхпит. Биһиэхэ элбэх уопсастыбаннай түмсүүлэрдээхпит, үлэ күргүөмнээхтик барар. Кэнники кэмҥэ саха тыынын уһугуннардыбыт. Ол эрээри, үлэни өссө күүһүрдэн, оҕолорго туһаайыахтаахпыт, — диэн эттэ.

Вилюяна Никитина, «Ийэ тыл» түмсүү салайааччытын солбуйааччы:

— Өрөспүүбүлүкэтээҕи «Ийэ тыл» көҥүл түмсүү ааспыт үйэ 90-с сылларыттан үлэлиир. 2022 сылтан хат сөргүтүллэн, үлэтин саҕалаабыта. Бэрэссэдээтэлинэн Наталья Михалева-Сайа талыллыбыта. Түмсүү салаалара улуустарга тэрилиннилэр. Онон улуустарга хамсааһын тахсан эрэр. 40-ча киһи киин сүбэҕэ баар. Үлэбит хайысхата киэҥ. Хас биирдии улууска, нэһилиэккэ түмсүүлэр баар буолуохтаахтар, — диэн үлэтин билиһиннэрдэ уонна бүгүҥҥү күҥҥэ баар кыһалҕалары торумнаата.

Дьэ, чахчы, үөһэттэн ким да ыйбакка, тыл, норуот туһугар долгуйар дьон бэйэлэрэ түмсэн, хамсааһыны таһаардылар. Бу норуот хамсааһына диэн этэр оруннаах. Эдэр төрөппүттэр сүүрэ-көтө, тэрийэ, атыттарга холобур буола сылдьаллара көрүөххэ үчүгэй.

Сыанаҕа «Күн» оҕо хамсааһынын оҕолоро — Амма оскуолаларын 80-ча үөрэнээччилэрэ  сахалыы таҥастаах тахсан, хоһоон аахпыттара, санааларын тиэрдибиттэрэ үлэ кэскиллээҕин көрдөрөр. Бу маннык оҕолор хамсааһыннара өрөспүүбүлүкэ үрдүнэн далааһыннанан эрэр.

Өрөспүүбүлүкэҕэ «Төрүт тыл» логопедтар, дефектологтар түмсүүлэрэ тэриллэн, оҕону сахалыы саҥардарга туһаайан, ситиһиилээхтик үлэлии сылдьаллар. Кинилэр пуорум үлэтигэр көхтөөхтүк кытыннылар.

Салгыы Амма улууһугар «Ийэ тыл» түмсүү салаатын үлэтин туһунан кэпсээтилэр. Аммаҕа бастакы пуорум тэриллэн, устуоруйаҕа киирдэ, үрдүк таһымнаахтык ыытылынна диэн бэлиэтээтилэр. Элбэх этии киирдэ.

Петр Табунанов, Амма улууһун «Ийэ тыл» түмсүүтүн бэрэссэдээтэлэ, Төрөппүттэр сэбиэттэрин салайааччы, анестезиолог-быраас:

— Нэһилиэктэртэн айаннаан кэлэн, биэс түһүлгэнэн барыта 320 киһи кытынна. Элбэх интэриэһинэй этиилэри иһиттибит. Тылбытын хараанныырга, сүппэтин туһугар ис сүрэхтэриттэн кыһаллар, бачча элбэх киһи кэлэрин бэйэбит да кэтэспэтэхпит. Бар дьон наадыйар, уһуктубут эбит диэн үөрүү кыыма саҕылынна, өссө күүскэ үлэлииргэ күүс-уох эбилиннэ.

Пуорум кыттыылаахтара оһуохайдаан, хаартыскаҕа түһэн, сүргэлэрэ көтөҕүллэн тарҕастылар.