“Арассыыйа” быыстапка-пуорум лиэксийэтин кыттыылаахтара сахалыы ойуулары уруһуйдаатылар

Тохсунньу 16 күнүгэр “Арассыыйа” быыстапка-пуорумҥа, кэрэтинэн уонна хаачыстыбатынан аан дойдуга тиийэ биллибит сахалыы үрүҥ көмүс киэргэллэр туһунан лиэксийэ буолан ааста. Лиэксийэни уонна маастар-кылааһы Альбина Пермякова ыытта.

Альбина Пермякова бэлиэтээбитинэн, саха төрүт киэргэллэрин, ордук үрүҥ көмүс ытарҕаны дьон улаханнык сэҥээрэр. “Дьахтарга үрүҥ көмүс оҥоһуктан ураты дьоһуннаах киэргэл суох. Үрүҥ көмүс, аптаах-ювелирдар айар кыахтарын арыйалларыгар киэҥ хонууга тэҥнээх. Дириҥ суолталаныыны уратытык бэлиэтиир уонна ый уотун оонньуутун чорботон биэрэр”, — диэн кини этэр.

Лектор сахалыы киэргэллэр киэҥник тарҕаммыт көрүҥнэрин сиһилии кэпсээтэ, ол иһигэр, лира быһыылаах ытарҕалары, сахалыы оһуор, ойуу суолтатын туһунан. Киэргэллэр үгэстэринэн, ураты уус-уран истиилинэн уонна быһыыларынан уратылаһаллар.

Ону тэҥэ, Альбина Пермякова лиэксийэ кыттыылаахтарыгар алгыс күүһүн туһунан билиһиннэрдэ.

Сахалыы киэргэл лиэксийэтин кэнниттэн тэрээһин кыттыылаахтара бэйэлэрэ сөбүлээбит сахалыы ойууларын уруһуйдаатылар.

Санатан эттэххэ, “Арассыыйа” быыстапка-пуорум 2023 сыл сэтинньи 4 күнүттэн 2021 сыл муус устар 12 күнүгэр диэри дойду бэрэсидьинэ Владимир Путин көҕүлээһининэн, экэниэмикэ араас салааларыгар дойду сүрүн ситиһиилэрин билиһиннэрэр соруктаах Москваҕа ВДНХҕа буолар. Бэйэлэрин быыстапкаларын дойду бары 89 эрэгийиэнэ туруораллар.

Ил Дархан уонна Бырабыыталыстыба пресс-сулууспата.