«Арассыыйа сүрэҕин» уотун Саха сиригэр Федоровтар аҕалыахтара

«Арассыыйа» быыстапка-пуорумҥа уматыллыбыт «Арассыыйа сүрэҕэ» диэн дьиэ кэргэн холумтанын уотун Саха сиригэр эдэр ыал Федоровтар аҕалыахтара. Кинилэр ааспыт сыл сэтинньитигэр «Арассыыйа» быыстапка-пуорумҥа ыал буолан, сахалыы сиэрдээх-туомнаах урууну көрдөрбүттэрэ.

Дьиэ кэргэн холумтанын уотун тохсунньу 23 күнүгэр, «Родные-Любимые» Бүтүн Арассыыйатааҕы пуорум чэрчитинэн, уматыллыаҕа уонна бары эрэгийиэннэргэ тиэрдиллиэҕэ. Бу пуорумҥа бүгүн бэрэсидьиэн Владимир Путин биллэрбит Дьиэ кэргэн сылын арыйаллар.

Муром куоракка Свято-Троицкай манастыырга сибэтиэй Петр уонна Февронья хараллан сытар сирдэригэр саҕыллыбыт уоттаах лампааданы Москваҕа элбэх оҕолоох Терентьевтар аҕалыахтара. Михаил уонна Екатерина ыал буолбуттара 25 сыл буолла, 6 оҕолоохтор.

От ыйын 8 күнүгэр — Сибэтиэй Петр уонна Февронья күннэригэр бүттүүн Арассыыйа Таптал, дьиэ кэргэн, эрэллээх буолуу күнүн бэлиэтиир. Петр уонна Февронья ыраас тапталлара номох буолан, үйэлэри уҥуордаан кэллэҕэ.

Бу уоттан өссө 12 лампааданы уматан баран, Москваҕа, Крымҥа, Саха сиригэр, Кузбасска, Ямало-Ненецкэй уокурукка, Татарстаҥҥа, Хотугу Осетияҕа-Аланияҕа, Волгоградскай уобаласка, Коми, ДНӨ, ЛНӨ Өрөспүүбүлүкэлэригэр, Запорожскай, Херсонскай уобаластарга, салгыы бары эрэгийиэннэргэ  тиэрдиэхтэрэ.

Саха сиригэр дьиэ кэргэн холумтанын уотун Жанна, Владислав Федоровтар дьиэ кэргэттэрэ аҕалыахтара. Кинилэр сахалыы сиэрдээх-туомнаах уруулара сэтинньигэ «Арассыыйа» быыстапка-пуорумҥа буолбута.

— Олус долгуйабыт — үрдүк эппиэтинэстээх миссия сүктэрилиннэ дии саныыбыт. Сибэтиэй тапталлаахтар манастыырдарыгар уматыллыбыт дьиэ кэргэн холумтанын уотун аҕалар чиэс биһиэхэ тиксибититтэн соһуйдубут, үөрдүбүт. Биһиги дьиэ кэргэммит «Арассыыйа» быыстапка-пуорум кэмигэр үөскээбитэ. Аптаах остуоруйаҕа сылдьар курдук санаммыппыт. Маннык элбэх киһи сахалыы үгэстэри, сиэри-туому интэриэһиргээн кэлиэ дии санаабатахпыт. «Арассыыйа» пуорумҥа өссө төгүл кыттарбытыттан олус үөрэбит, Саха сирин дьоһуннаахтык көрдөрүөхпүт дии саныыбыт, — диэн Жанна, Владислав Федоровтар санааларын үллэһиннилэр.

«Арассыыйа сүрэҕин» уматыы сиэригэр-туомугар бары эрэгийиэннэртэн бастыҥ дьиэ кэргэттэр династиялара, байыаннай дьайыы кыттыылаахтарын дьиэ кэргэттэрэ кэлэн кыттыахтара.

Ил Дархан, бырабыыталыстыба дьаһалтатын пресс-сулууспата.