«Азия оҕолоро» оонньуулар волонтердарын куорпуһугар 5000-тан тахса сайаапка киирдэ

«Азия оҕолоро» VIII оонньууларга волонтердары талыыга сайаапкалары ылыы түмүктэннэ.

Бу туһунан СӨ Баһылыгын уонна Бырабыыталыстыбатын пресс-сулууспата иһитиннэрэр. Кулун тутар 31 күнүгэр диэри волонтерга хандьыдааттары тургутан көрүү уонна кэпсэтии ыытыллыа.

Тургутууну ааһыы бары түһүмэҕин кэнниттэн «Азия оҕолоро» VIII оонньуулар волонтердарын испииһэгэ тахсыаҕа. «Азия оҕолоро» оонньууларга барыта 1900 волонтер 19 хайысханан үлэлиэ.

Санатан эттэххэ, оонньуулар Дьокуускай куоракка быйыл бэс ыйын 25 күнүттэн от ыйын 7 күнүгэр диэри ыытыллыахтара. Эдэр атлеттар успуорт 24 көрүҥэр күрэхтэһиэхтэрэ, манна 224 кэмпилиэк наҕараада оонньонуо. Быйыл оонньууларга 20-тэн тахса дойду кыттара күүтүллэр.