Байыаннай дьайыы зонатыгар сорудахтары толорор байыаннайдар эрэ буолбакка, биирдиилээн дьон эмиэ байыаннай дьайыы бэтэрээнин дастабырыанньатын ылар кыахтаннылар. РФ Оборуонаҕа министиэристибэтэ Бырабыытылыстыба уурааҕын бырайыагар уларытыылары киллэрэр. Бу туһунан «Парламентская газета» суруйда.
Докумуоҥҥа 2022 сыл олунньу 24 күнүттэн Украина, ДНӨ уонна ЛНӨ, оттон 2022 сыл балаҕан ыйын 30 күнүттэн Запорожскай уонна Херсонскай уобаластар сирдэригэр-уоттарыгар байыаннай дьайыы сорудахтарын толорууга көмөлөспүт дьон туһунан этиллэр.
Кинилэр ураты өҥөлөөх буолуохтаахтар уонна ити этиллибит сирдэргэ 6 ыйтан итэҕэһэ суох үлэлээбит эбэтэр туох-эмэ биричиинэнэн командировкаларыттан болдьоҕун иннинэ төннүбүт буолуохтаахтар. Холобур, манна Ыксаллаах быһыы-майгы министиэристибэтин, атын структуралар үлэһиттэрэ, командировкаҕа барбыт исписэлиистэр уо.д.а. киирэллэр.
Сүрүн уларытыы — фроҥҥа көмөлөспүт уонна байыаннай дьайыы наадыйыытын хааччыйбыт дьоҥҥо бэтэрээн статуһа ордук тиийимтиэ буолла.
Маны таһынан, дастабырыанньаны биэриигэ саҥа биричиинэлэр баар буоллулар. Билигин бэтэрээн статуһугар байыаннай дьайыыга хааччыйыыга ураты өҥөлөөх, холобур, РФ Бэрэсидьиэнин, РФ Бырабыыталыстыбатын эбэтэр биэдэмистибэлэр наҕараадаларынан бэлиэтэммит дьон сайабылыанньа биэриэхтэрин сөп.
Байыаннай дьайыы бэтэрээннэрэ туох бырааптаахтарый?
- Ый аайы бэриллэр харчынан төлөбүр (ЕДВ);
- Дьиэ-уот уонна хомунаалынай өҥө төлөбүрүн 50 бырыһыанын толуйуу;
- Нолуокка уонна биэнсийэҕэ чэпчэтиилэр;
- Суукка сайабылыанньа биэрэргэ судаарыстыбаннай нолуогу төлөөһүнтэн босхолонуу.
- Социальнай өҥө бакыата: манна босхо эмтэри, мэдиссиинэ тэриллэрин ылыы, сонотуоруй-курортка сынньанар путевкалар, куорат таһынааҕы тимир суол тырааныспарыгар, ону тэҥэ эмтэнэр сиргэ баран-кэлэр айан ороскуотуттан босхолооһун киирэр.