Биһиги киһибит — “Путин хамаандатыгар”

Саха Өрөспүүбүлүкэтигэр “Норуот Бүтүн Арассыыйатааҕы фрона”  салайааччыта Валерий Лютай Москваттан  кэллэ. Кини “Путин хамаандата” актыып мунньаҕар кыттан, Владимир Путин  саҥа болдьоххо турар кандидатуратын өйөөтүлэр.

«Олус истиҥ тыыннаах тэрээһин буолла. Эрэгийиэннэртэн кэлбит боростуой дьон биһиги дойдубут элитатынан ааттанар дьону кытары көрүстэ. Мин, бастатан туран, байыаннай эпэрээссийэ  фроннарыттан кэлбит байыастар тустарынан этэбин.     “Арассыыйа Дьоруойа” кыһыл сулустаах байыастары көрүстүм. Биһиги мунньахпыт кыттыылаахтарын ортолоругар ааттаах-суоллаах хирурдар, үтүөлээх спортсменнар, шоу-биисинэс  сулустара бааллар”, — диэн кэпсээтэ Валерий Алексеевич.

Бу тэрээһини  Арассыыйа инникитин быһаарар устуоруйа түгэнинэн ааттыахха сөп: патриоттар Владимир Путины 2024 сылга бэрэсидьиэн  быыбарыгар хандьыдаатынан туруордулар.

Москваҕа тэрээһиҥҥэ Саха сириттэн үс киһи кытынна. Валерий Лютайы сэргэ “Путин хамаандатыгар” таба иитэр хаһаайыстыба салайааччыта Роман Туприн уонна ДНӨ Саха сирин тирэх пуунун волонтера Марина Бахилина бааллар. Байыаннай эпэрээссийэҕэ кыттар үс уол ийэтэ 2022 сылтан байыаннай эпэрээссийэ ыытыллар сиригэр үлэлиир, байыастары сылаас аһылыгынан хааччыйар.