Биир кэлим эксээмэни ыытыыга Саха сирэ “күөх зонаҕа” киирдэ

Бу күннэргэ Москваҕа Үөрэҕи уонна билими кэтээн көрөр федеральнай сулууспа үөрэх хаачыстыбатын сыаналааһыҥҥа кэмпириэнсийэни тэрийэн ыытта. Саха сирэ манна кытынна.

Тустаах мунньах сыллата ыытыллар. Үөрэх хаачыстыбатын сыаналааһын боппуруостарын ырыталлар, судаарыстыбаннай түмүктүүр аттестация (эксээмэннэри) түмүгүн таһаараллар, эксээмэни ыытыыны тэрийии туһунан кэпсэтэллэр, соруктары туруораллар. Саха сирэ өрүү буоларыныы, 2023 сылга сүрүн түмүктүүр эксээмэни (ОГЭ), биир кэлим эксээмэни (ЕГЭ) ыытыы хаачыстыбатынан “күөх зонаҕа” киирбит, бастыҥнар кэккэлэригэр бэлиэтэммит. Бу туһунан Үөрэх уонна билим миниистирэ Нюргуна Соколова телеграмҥа ханаалыгар суруйар.