Хаартыска: СӨ култууратын уонна духуобунай сайдыытын министиэристибэтин саайтыттан ылылынна
Өрөспүүбүлүкэтээҕи анал (коррекционной) оскуола-интэринээккэ бэҕэһээ, Билии күнүнэн, үөрүүлээх тэрээһин буолла. Саҥа үөрэх дьылыгар оскуола сүүһүнэн оҕолорго аанын арыйда. Оҕолор үөрэнэллэригэр манна бары усулуобуйаны тэриллибит.
Тэрээһин чэрчитинэн И.Н.Егоров-Горнай аатынан харахтарынан көрбөт уонна мөлтөхтүк көрөр дьон анал бибилэтиэкэтин бэрэстэбиитэллэрэ оскуола 5, 6 уонна 7 кылаастарыгар Брайль ньыматынан бэчээттэммит саха тылын учуобунньуктарын, 20 экземпляры, бэлэхтээтилэр.
«Тиражирование учебников якутского языка рельефно‑точечным шрифтом по системе Брайля» бырайыагынан оскуола уонна бибилэтиэкэ үс сыл бииргэ үлэлииллэр. Аан бастаан 2024 сыллаахха 1 кылаас үөрэнээччилэригэр «Букубаар» таһаарбыттара, ол Арассыыйа таһымыгар билиниини ылбыта. Онтон 2025 сыллаахха оскуолаҕа 2, 3 уонна 4 кылаастарга учуобунньуктар бэриллибиттэрэ.
2027 сылга диэри бырайыак чэрчитинэн оскуола алын сүһүөх уонна орто кылаастарын анал шрифтээх учуобунньуктарынан хааччыйыы былааннанар. Ол аата, көрбөт уонна мөлтөхтүк көрөр оҕолорго төрөөбүт тылы билэр, баһылыыр кыаҕы биэрэр.
5-7 кылаастарга аналлаах учуобунньуктары бэлэмнээһиҥҥэ быйыл 8 ый кэриҥэ үлэлэспиттэр. Бырайыагы олоххо киллэриигэ Брайль эрэдээктэрэ Сахаайа Данилова, тэхэньиичэскэй эрэдээктэрдэр Гаврил Максимов уонна Марина Дьяконова, сүбэһит Юрий Москвитин, үөрэх матырыйаалларын адаптациялааһыҥҥа тифлопедагог, РФ уопсай үөрэхтээһинин бочуоттаах үлэһитэ, СӨ үөрэҕирии бэтэрээнэ Мария Ивановна Алехина-Ушницкая кыттыыны ылбыттар.
Бырайыак СӨ «Сохранение и развитие государственных и официальных языков в Республике Саха (Якутия)» Судаарыстыбаннай бырагырааматыгар сөп түбэһиннэрэн олоххо киирэр.
Оскуола дириэктэрэ Павел Григорьевич Григорьев бу суолтатын тоһоҕолоон бэлиэтээтэ: «Бу биһиги оскуолабытыгар олус улахан суолталаах. Брайль ньыматынан бэчээттэнэн тахсыбыт учуобунньуктар көмөлөрүнэн саха тылын үөрэтии хаачыстыбалаахтык барар, оҕолор ис хоһоонун толору өйдүүллэр, матырыйаалы туһанан бэйэлэрэ үлэлиэхтэрин сөп. Ону таһынан учууталларга улахан көмө буолар, билигин үчүгэй түмүктэри ситиһэргэ кыаҕы биэрэр мэтэдиичэскэй баазалаахпыт. Бу бырайыакка кыһамньыларын ууран үлэлэспит дьоҥҥо барыларыгар ис сүрэхпититтэн махтанабыт». Бу туһунан СӨ култууратын уонна духуобунай сайдыытын министиэристибэтин саайтыгар суруллар.
Сиһилии: https://minkult.sakha.gov.ru/news/61374
Хаартыскалар: СӨ култууратын уонна духуобунай сайдыытын министиэристибэтин саайтыттан
Өрөспүүбүлүкэ нэһилиэнньэлээх пууннара массыына кыһыҥҥы суола аһыллыар диэри ирдэнэр кээмэйдээх оттук-энэргэтиическэй саппааһынан олоччу хааччылыннылар. Бу…
«Күн бүгүн эрэгийиэн иһинээҕи көтүүлэри үбүлээһин өрөспүүбүлүкэ бүддьүөтүн суотугар эрэ ыытыллар. Бу сыалга 250 мөлүйүөн…
Арассыыйаҕа массыына атыылаһарга чэпчэтиилээх кирэдьииттээһин хас даҕаны судаарыстыбаннай бырагыраама үлэлиир. Ону туһанан саҥа массыынаны атыылаһыахха…
Бу күннэргэ Горнай улууһун Бэрдьигэстээх сэлиэнньэтин ыччаттара нэһилиэк сэбиэтэ тэриллибит күнүн бэлиэтээтилэр. Бу туһунан Бэрдьигэстээх…
Сэтинньи 4-6 күннэригэр Дьокуускайга Сомоҕолоһуу күнүгэр аналлаах норуот уус-уран оҥоһуктарыгар босхо маастар-кылаастары ыытыахтара. Тэрээһини «Мин…
Өлүөнэ муостатын тутар былаһааккаҕа өрүс флотун муус туруон иннинээҕи үлэтэ түмүктэннэ. Ааспыт сезон устата 20-чэ…