Бу ыйга Саха сиригэр икки киинэ сүрэхтэниэҕэ

Сэтинньигэ Саха сиригэр икки сахалыы киинэ киэҥ экрааҥҥа тахсыаҕа — Дмитрий Давыдов режиссердаах «Песни лета» киинэ уонна Степан Бурнашев режиссердаах «Биһиги кыһыммыт» киинэ. Бу икки бырайыактар Sinet Spark пуонда Sakhawood бырагырааматынан үбүлэнэн тахсаары тураллар. 

Дмитрий Давыдов саҥа киинэтэ фолк-кэмиэдьийэ диэн ураты жанрынан уһулунна. Манна сайылыкка олорор сиэн уонна эһэ олохторо көстүөҕэ. Кинилэр бэйэлэрин ураты эйгэлэригэр олорон ону-маны туталлар, уһаналлар, араас дьону көрсөллөр-атаараллар. Ол сылдьан биир күн өйүн сүтэрбит эр киһини көрсөннөр, олохторо тосту уларыйар. Онон бу сайыны умнуллубаттык атаараллар. Саҥа киинэ Саха сирин бары киинэ тыйаатырдарыгар сэтинньи 10 күнүттэн көстүөҕэ.

Оттон Степан Бурнашев режиссердаах «Биһиги кыһыммыт» киинэ сэтинньи 24 күнүттэн көстүөҕэ. Драма жанрдаах саҥа киинэҕэ уон сыл бииргэ олорбут эдэр ыал олоҕо көстөр. Бэйэ-бэйэни өйдөспөт буолуу, арахсыы, дьиэ кэргэн сыаннастарын туһунан ураты киинэ араас таһымнаах бэстибээллэргэ ситиһиилээхтик кытынна.