«Булгунньахтаах» хаһаайыстыба

Үөһээ бүлүүлэри этинэн-үүтүнэн хааччыйар

 Үөһээ Бүлүүгэ «Булгунньахтаах»  бааһынай хаһаайыстыбата улуус олохтоохторун эт эмиһинэн, минньигэһинэн, хаачыстыбалааҕынан хааччыйа олорор.

«Сүөһү төрдө буол»

«Булгунньахтаах» бааһынай хаһаайыстыба салайааччыта, улуус бочуоттаах олохтооҕо, улуус тыатын хаһаайыстыбатын туйгуна, СӨ норуотун хаһаайыстыбатын үтүөлээх үлэһитэ Анна Трофимовна Семенова урут эргиэҥҥэ үлэлиирэ, ыал аҕата Виктор Павлович Васильев авиапортка суоппардыыра. Биллэрин курдук, 90‑с сылларга ыһыллыы-тоҕуллуу саҕаланан, хамнас диэни 4–5‑тии ый көрбөт кэмнэрбит тирээбиттэрэ. Ол иһин бастаан утаа ыал ийэтэ урбаанынан дьарыктанан баран, хаһаайыстыба тэринэргэ санаммыта. “Арай биирдэ өйдөөбүтүм, дьиэбиттэн мин эрэ үлэлиир курдук буолан хааллым: икки уолум, кэргэним көҥүл-босхо сылдьаллар. Мин таһаҕас бөҕөнү тас да тас, сүүр да сүүр, аны айаннаан кэлэн баран дьиэбэр кэлэн ыал ийэтэ буолуохпун, дьиэбин өрө тардыахпын эмиэ наада. Ол иһин бары үлэлээн, айахпытын ииттиниэххэ диэн санааттан, хаһаайыстыба тэриннэххэ хайдах буолуо эбитэй диэн ааҕынан-суоттанан баран, син киһи олоруох курдук эбит диэн санааҕа кэлбитим. Кэргэним үлэтиттэн уурайбыта, итиэннэ 1992 сыллаахха кэргэммин кытта «Булгунньахтаах» бааһынай хаһаайыстыбаны тэриммиппит”, — диэн Анна Трофимовна кэпсээнин саҕалыыр.

Бу иннинэ 1988 сыллаахха Анна Трофимовна ийэтэ тарбыйахтаах ынах биэрбитэ. Бэйэтэ үтүө санаалаах, оннук тыллаах-өстөөх саха мындыр дьахтара этэ. Кини ол сүөһүтүн биэрэригэр баайан туран: «Сүөһү төрдө буол», — диэн алҕаабыта. Ол алгыһа тиийэн, сүөһүлэрэ кэлээт даҕаны барыта тыһы ньирэйдэри төрөөн барбыта, биирдэ да оҕустамматаҕа. Инньэ гынан, биир да сүөһүлэрин өлөрбөккө, төбө ахсаанын элбэтэр эрэ туһугар үлэлээбиттэрэ.

Хаһаайыстыба тэринэллэригэр авиапортан 4 км тэйиччи сытар кэргэнин аҕатын төрөөбүт алааһын бэйэлэрин бас билиилэригэр ылбыттара. Туга да суох быраҕыллыбыт бааһына сири күрүөлээн, дьиэ, хотон, дал туттубуттара. Оччолорго хантан да көмөнү ылбатахтара, харчы кырыымчыга да бэрт этэ.

Хаһаайыстыбаларыгар бастаан биэс ынахтаах, төбөтүнэн 15 сүөһүлээх этилэр. Онтон сүөһү ахсаана эбиллэн-эбиллэн күн бүгүн 317 ыанар ынахтаахтар, ол иһигэр ньирэйдэрэ 109, уопсайа 112 ынах төрөөн турар. Маны таһынан, 2–3 саастаах 187 субай сүөһүлээхтэр. Ынахтарын күҥҥэ үстэ дуойканан ыыллар.

Үүттэрин ас-үөл кэмбинээтигэр туттараллар

Хаһаайыстыбаҕа 10 үлэһиттээхтэр, 5 киһини туох баар соцбакыатынан хааччыйаллар. Маны таһынан, 3 киһини наймылаһан үлэлэтэллэр. Хамнастарын төлүүллэр. “Билигин сэлээркэ сыаната наһаа үрдээтэ, үүппүт киилэтэ 100 солкуобай дии, ол иһин, хайдах да баҕарбытым иһин, улахан хамнаһы биэрэр кыаҕым суох. Үүттэн киирбит харчыбыт барыта үлэһиттэр хамнастарыгар уонна кинилэргэ дьиэ тутуутугар бара турар”, — диэн бүгүҥҥү балаһыанньаны кэпсиир.

Билигин биир ынахтан сылга 2 тонна 900 киилэ үүтү ыыллар. Күн аайы 700–800, сайыҥҥы өттүгэр 2 тонна лиитирэ үүтү тохтоло суох «Үөһээ Бүлүү» ас-үөл кэмбинээтигэр туттара олороллор.

ГалинаВАСИЛЬЕВА.
Үөһээ Бүлүү.

ААПТАР ХААРТЫСКАҔА ТҮҺЭРИИТЭ УОННА HTTPS://WWW.MAGNIFIC.COM/RU

Сиһилии хаһыат от ыйын 31 күнүнээҕи № -гэр ааҕыҥ.