Буойуттарга – Саха сирин учуонайдарыттан квадрокоптер

Өрөспүүбүлүкэ учуонайдара байыаннай дьайыы кыттыылаахтарыгар саҥа, күүстээх квадрокоптеры тиксэрдилэр.

Ол туһунан Арктикатааҕы научнай чинчийэр киин пресс-сулууспатыгар киин салайааччыта Юрий Шипицын кэпсээтэ. Кини бэлиэтииринэн, учуонайдар хара бастакыттан көмөлөһөн, билигин даҕаны бу үтүө дьыалаларын тус иэстэрин курдук ылынан, салгыы ыыталлар.

— Бу дрон бэйэтэ көтөр аппарааттары салайар оператордары үөрэтиигэ туһаныллыаҕа. Буойуттар квадрокоптеры тутан баран, тиэхэньиичэскэй өттүнэн үрдүк хаачыстыбатынан бу дрон элбэх оператордары үөрэтиигэ улахан көмөлөөх уонна көдьүүстээх буолуоҕун бэлиэтииллэр.
Саха сирин учуонайдара өрөспүүбүлүкэбит Ил Дархана уонна салалтата көрдөрөр үтүө холобурдарынан инники кирбиигэ баар биир дойдулаах буойуттарбытыгар араас өрүттээх көмөнү, өйөбүлү оҥороллор уонна инникитин да көмөлөһөр былааннаахтар.