Бурятия оператын артыыстара көрөөччүлэри сөхтөрдүлэр

Саха сиригэр опера ускуустубатын сэҥээрээччилэргэ бу нэдиэлэҕэ икки күннээх дьоро күн тосхойдо. Ол курдук, Суорун Омоллоон аатынан Опера уонна балет тыйаатырыгар Г.Ц.Цыдынжапов аатынан Опера уонна балет судаарыстыбаннай академическай тыйаатырын 5 артыыһа  гостуруоллаата.

 

Икки тыйаатыр холбоһуктаах бырайыага Арассыыйа Норуоттарын сомоҕолоһууларын уонна Саха Өрөспүүбүлүкэтигэр Култуура сылларыгар ананна.
Бастакы күн, ыам ыйын 20 күнүгэр Дж.Пуччини «Богема» оператын саха көрөөччүлэригэр бэлэхтээтилэр. Испэктээк нуучча тылынан субтитрдаах буолла. Операны СӨ ускуустубатын үтүөлээх диэйэтэлэ Карл Сергучев туруорда.
Манна сүрүн оруолу — дьадьаҥы уонна ыарыһах кыыһы Мимины Арассыыйа үтүөлээх артыыската, Бурятия Өрөспүүлүкэтин норуодунай артыыската Билигма Ринчинова, кини тапталлааҕын Рудольфу норуоттар икки ардыларынааҕы куонкурустар лауреаттара Жамсо Бамбагаев толордулар. Саха сиригэр хайыы үйэ үсүһүн кэлбит Билигма Ринчинованы Саха сирин көрөөччүлэрэ күүстээх ытыс тыаһынан көрүстүлэр.
Бурятия эдэркээн артыыската, норуоттар икки ардыларынааҕы куонкурустар лауреаттара Дина Санданова — ырыаһыт Мюзетта, норуоттар икки ардыларынааҕы куонкурустар лауреаттара Надмит Надмитов — худуоһунньук Марсель, Бурятия Өрөспүүбүлүкэтин норуодунай артыыһа Эдуард Жагбаев —— бөлүһүөк Колен, ону сэргэ Москваттан анаан-минээн кэлбит норуоттар икки ардыларынааҕы уонна Бүтүн Арассыыйатааҕы куонкурустар лауреаттара, Опера тыйаатырын уонна Москватааҕы консерватория камернай хорун солиһа Дмитрий Пикутскай мусукаан Шонар (былырыын эмиэ ыллаабыта) оруолларын, уо.д.а артыыстар чаҕылхайдык толордулар. Маассабай сыаналарга биһиги тыйаатырбыт хорун артыыстара, Опера тыйаатырын солистара оонньоотулар. Туруорууну СӨ ускуустубатын үтүөлээх диэйэтэлэ Павел Васьковскай салайааччылаах симфоническай аркыастыыр доҕуһуоллаата.
«Богема» төһө да курус нуотанан, Мими тыҥа сэллигиттэн өлүүтүнэн түмүктэннэр, баритон, бас, сопрано куоластаах эдэркээн артыыстар оруолларын итэҕэтиилээхтик тириэрдиилэриттэн көрөөччү дуоһуйда. Ордук Мими тапталлааҕын кытары быраһаайдаһар ырыатын уонна эдэрдии эрчимнээх, туох да кыһалҕата суох көҥүл олохтоох  уолаттар өлүү-сүтүү хомолтотун билэн хараасталларын харах уулаах көрөҕүн…

Сарсыныгар   буолбут икки отделениелаах Гала-кэнсиэркэ икки тыйаатыртан тэҥ ахсааннаах артыыстар кытыннылар. Бэҕэһээ аҕай «Богема» операҕа истэн-көрөн,  хайыы үйэ сэҥээрбит артыыстарбыт аны тыйаатырбыт улахан сыанатыгар биирдиилээн уонна биһиги артыыстарбытын кытары толорууларынан сүрэхпитин сүүйдүлэр. Кэнсиэр Надмит Надмитов уонна тыйаатырбыт хорун эр дьонун «Кармен» операттан ырыаларынан саҕаланна. Барыбытт киэн туттуубут, СӨ норуодунай артыыһа, П.Ойуунускай аатынан судаарыстыбаннай бириэмийэ лауреата Александр Емельянов «Травиата» операттан толордо. Манна сыһыаран эттэххэ, кини өссө 2008 сыллаахха Билигма Ринчинова бастакы сольнай кэнсиэригэр ыҥырыллан, «Травиатаҕа», оттон Дьокуускайга «Риголетто» операҕа бииргэ ыллаабыттара.

СӨ үтүөлээх артыыската Екатерина Захарова уонна Надмит Надмитов, Дина Санданова уонна Жамсо Бамбагаев, Екатерина Захарова уонна Жамсо Бамбагаев, СӨ норуодунай артыыһа Николай Попов уонна Билигма Ринчинова, Дмитрий Пикутскай уонна Екатерина Захарова, СӨ үтүөлээх артыыската Екатерина Корякина уонна Дина Санданова, Надмит Надмитов уонна Жамсо Бамбагаев (буряттыы) күүстээх куоластара уонна  толорор маастарыстыбалара олус дьүөрэлэһэллэрэ кэрэхсэттэ. Бэл, биһиги тыйаатырбытыгар мэлдьи ыллыы сылдьар артыыстар курдук санааны үөскэттилэр.
Кэнсиэркэ соһуччу уонна кэрэхсэтэр түнэннэр эмиэ элбэхтэр. Ол курдук, артыыс идэтэ утумнааччылардааҕын биллибит. Дмитрий Пикутскай -– СӨ ускуустубатын үтүөлээх диэйэтэлэ, С.Омоллоон аатынан Опера уонна балет тыйаатырын дирижера Николай Пикутскай төрөппүт уола. Онтон саха аркыастырын концермейстера, СӨ култууратын туйгуна Афанасий Герасимов -– биллиилээх композитор Кирилл Герасимов уола. Афанасий Ж.Массне оператыттан искириипкэ толоруута олус сонуннук иһилиннэ. Кэрэ куоластаах Екатерина Захарова хас да партияны толорон, тыйаатырга олус киэҥ репертуардааҕын көрдөрдө.

Туох барыта түмүктээх буолар, олус күүтүүлээх уонна өрө күүрүүлээх бырааһынньык киэһэтэ түмүктэнэр, быыс сабыллар кэмэ бу тиийэн кэллэ…  СӨ култуураҕа уонна духуобунай сайдыыга миниистирэ Афанасий Ноев, Опера уонна балет тыйаатырын дириэктэрэ Владислав Левочкин Бурятия тыйаатырын артыыстарыгар  Махтал суруктары, өйдөбүнньүк бэлэхтэри туттардылар. Тыйаатыр кэлэктиибэ чахчыта да көмүс куоластаах Билигма Ричиноваҕа сертифицированнай бриллианы бэлэх уунна.
Оттон тыйаатыр дириэктэрэ Владислав Левочкиҥҥа  эрэгийиэннэр икки ардыларыгар култуурунай сибээһи бөҕөргөтүүгэ улахан кылаатын иһин Бурятия баһылыга Алексей Цыденов Махтал суругун  Буряти норуодунай артыыһа Эдуард Жагбаев туттарда.

ххх
Биир үөрүүлээх сонуну иһитиннэрдэхххэ, Суорун Омоллоон аатынан Опера уонна балет тыйаатырын айар бөлөҕө быйыл күһүн Бурятия киин куоратыгар тиийэн, Дж. Верди «Риголетто» оператын көрдөрүөҕэ. Ону сэргэ Дьокуускайга көрдөрүллүбүт гала-кэнсиэр хатыланан, Саха сирин талааннаах артыыстарын Бурятия көрөөччүлэригэр билиһиннэрэллэригэр баҕара хааллыбыт.