Чурапчыга Чөл олох сылынан ырааһырдыы үлэтэ ыытыллар

Бу күннэргэ өрөөспүүбүлүкэ улуустарыгар ырааһырдыы үлэтэ тэтимнээх ыытыллар.

«Чурапчы нэһилиэгэ» МТ баһылыгын сааскы ырааһырдыыга дьаһала муус устар 2 күнүгэр тахсыбыта. Чурапчы нэһилиэгэр хаарбах дьиэлэри көтүрүү, ыраастааһын үлэтэ үгүс. Ол курдук, Трактовай уулусса хаарбах дьиэлэрин “Хатан” ХЭТ көтүрдэ. Салгыы Ярославскай, Артемьев, Ленин, Константинов, Коркин уулуссаларын  хаарбах дьиэлэрин көтүрүү былааннанар.

Быйыл Чурапчы нэһилиэгэр Чөл олох сыла биллэриллэн, ырааһырдыы уонна тупсарыы үлэлэригэр ордук болҕомто ууруллар. Бу нэдиэлэҕэ хаһаайыстыбаннай тэрилтэлэр улахан уйуктаах тиэхиньикэлэрэ ыраастааһын үлэтигэр олохтоохтук ылыстылар.

Кинилэр Ярославскай аатынан уулуссаҕа турбут хаарбах дьиэ көтүрүллүбүт эргэ матырыйаалын Павел Пинигин аатынан уулусса кытыытын бөҕөргөтүүгэ тиэйдилэр.

Тутуу матырыйаалын сааскы халаан уутун бохсон, суолу бөҕөргөтүүгэ туһаннылар. Үлэ субуотунньугар кыттыбыт дьону итии, тотоойу аһынан «Улыбка» уһуйаан куукунатын кэлэктиибэ хааччыйда. Кинилэргэ нэһилиэк дьаһалтата истиҥ махталын тиэртэ.

Ырааһырдыы үлэтин туһунан бэйэтин телеграм-ханаалыгар «Чурапчы нэһилиэгэ» МТ дьаһалтата иһитиннэрдэ.