Дьиэ кэргэн сыла саҕаланыаҕыттан Саха сиригэр генетическэй скрининг 4 тыһыынча саҥа төрөөбүт оҕоҕо оҥоһулунна

Дойдуга Дьиэ кэргэн уонна Саха сиригэр Оҕо саас сыла саҕаланыаҕыттан өрөспүүбүлүкэҕэ неонатальнай-генетическэй скрининг 4 тыһыынча саҥа төрөөбүт оҕоҕо оҥоһулунна.

Ааспыт сылга Саха сиригэр бу скрининг 11 тыһыынчаттан тахса оҕоҕо оҥоһуллубута диэн  СӨ Ил Дарханын уонна Бырабыыталыстыбатын пресс-сулууспата иһитиннэрэр. Биһиги дойдубутугар неонатальнай скрининг ааспыт сылтан киэҥник хабан ыытыллар буолбута. Билигин оҕо төрөөтүн кытта хаан анаалыһын ылан, 36-тан тахса төрүөҕүттэн баар уонна нэһилиэстибэннэй ыарыылары бастакы симптомнара көстө да иликтэринэ диагностыыллар. Бу бэрэбиэркэлээһин фенилкетонурияны, төрүөҕүттэн бэриллибит  гипотиреоһы, адреногенитальнай синдромы, муковисцидоһы, галактоземияны, спинальнай быччыҥ атрофиятын (СМА), первичнэй иммунодефицити (ПИД) уонна эттиктэр атастаһыктарыгар баар буолар нэһилиэстибэннэй ыарыылар бөлөхтөрүн буларга оҥоһуллар.

Бу саҥа төрөөбүт оҕолору чинчийии  кэмигэр диагноһын туруора охсон, төрүөҕүттэн баар уонна нэһилиэстибэннэй ыарыылаах оҕолору эмтииргэ, диспансернай кэтээн көрүүнү ыытарга көдьүүстээх. “Ил Дархан Айсен Николаев биллэрбит Оҕо аймах сылыгар оҕо доруобай буоларыгар ураты болҕомто ууруллар. Ааспыт сылтан өрөспүүбүлүкэҕэ оҥоһуллар кыһыл оҕону скрининнээһин,  оҕону кыра эрдэҕиттэн инбэлиит оҥорор ыарыылары диагностарын билэ охсорго туһаайыллар. Өрөспүүбүлүкэҕэ хайыы-үйэ скрининг чуолкай алгоритмнара уонна федеральнай Референснэй кииннэр таһымнарыгар ону бигэргэтэр диагностиканы ыытыы оҥоһулунна. Ааспыт сылга бу ньыманан 3 нэһилиэстибэннэй ыарыыны булбуппут”, — диэн кэпсээтэ Доруобуйа харыстабылын миниистирэ Лена Афанасьева.

Бу үлэ өрөспүүбүлүкэҕэ дойду Бэрэсидьиэнэ Владимир Путин көҕүлээһининэн тэриллибит “Доруобуйа харыстабыла” национальнай бырайыак сыалын-соругун толорууга ыытыллар.

Хаартыска: ДьРКБ пресс-сулууспатын түһэриитэ