Дракон сыла: муодаҕа тугуй?
Саҥа сылбыт үүнэрэ ый аҥаара эрэ хаалла. Онуоха үгүс ыал күүтүүлээх бырааһынньыкка бэлэмнэнэн, дьиэлэрин истэрин-тастарын симээбиттэрэ, киэргэппиттэрэ, харыйаларын туруоран Моруос Оҕонньору күүппүттэрэ ыраатта.
Аныгы кэм ирдэбилинэн буолуо эбитэ дуу, реклама күүһэ эбитэ дуу, сыл аайы Саҥа Дьылбытыгар муода уларыйан иһэр. Быйыл, дьэ туох муодаҕа кэлбитий?
Сыл хаһаайына хайдах харыйаны ордоруой?
2024 сыл – От күөҕэ Дракон сыла. Кытай мифологиятыгар дракон күүстээх, бөҕө-таҕа, муударай харамай буолан ойууланар. Онон кэлэр сыл энэргиэтикэтэ күүстээх, ол иһин ситиһиини, табыллыыны аҕалыаҕа, интэриэһинэй, чаҕылхай түгэннэри бэлэхтиэҕэ диэн этэллэр.
Быйыл хаһааҥҥытааҕар да тыыннаах харыйаны дьиэҕэ туруорар ордук буолуо. Искусственнай харыйалаах дьон бэс, пихта лабаатын уулаах иһиккэ туруордаххытына да, сыл хаһаайына кырыы хараҕынан көрүө суоҕа диэн быйылгы муоданы толкуйдааччылар суруйаллар.
Дракон от күөҕэ өҥнөөҕүн иһин, быйыл дьиэбитин киэргэтэрбитигэр бу өҥү хоточчу туттарбыт ордук эбит. Онон харыйабыт оннук дьүһүннээх буолуохтаах. Маҥан, халлаан күөх, оруосабай о.д.а. дьүһүннээх мастары дракон сөбүлээбэт үһү.
Билигин экология өттүнэн куттала суох да, экэниэмикэ өттүнэн барыстаах да буолан, био-гирляндалар ураты миэстэни ыллылар. Ол аата, киһи бэйэтэ оттон-мастан, таҥастан, кумааҕыттан оҥорбут гирляндалара күндүтүйэн иһэллэр. Дьон ааспыт сыллааҕы умнуллубат түгэннэрин хатаабыт хаартыскаларынан, кэлэр сылга тугу баҕаралларын бэчээттэтэн,
флажок быһыылаан сапка иилэн харыйаларын симииллэр эбит. Эбэтэр сөбүлүүр киинэлэриттэн түмүллүбүт хаартыскаларынан, ханнык эмит кэм истиилинэн, бэчиэнньэлэринэн,
кэмпиэттэринэн киэргэтиэххэ сөп.
Манна диэн суруйдахха, быйыл хомуллар харыйалар баар буолбуттарын бэлиэтии көрдүм. Дьааһыгыттан хостоот, харыйаҕын тиэрэ тартыҥ да, лаглаччы туран кэлэр! Аны оннук төттөрү туттуҥ да хомуллан хаалар. Үрүт үрдүгэр лабаалары иилэн, көннөрөн сордоммоккун, бэрт буолууһу!
Искусственнай уонна тыыннаах харыйаны хайдах сөпкө талар туһунан сиһилии ааспыт нүөмэрбитигэр уонна саайтпытыгар суруйбуппут.
Оонньуурбут саарык эрэ буолбат
Кэлэр сылбыт хаһаайына бэйэтэ көмүс хатырыктаах буолан, харыйа кылабачыгас оонньуурдаах уонна дьиримнэс уоттардаах буоларын ордоруо диэн эмиэ Саҥа Дьыл муодатын быһаарааччылар бэлиэтээн суруйаллар.
Ити курдук, быйылгы муодаҕа натуральнай, экологичнай матырыйаалтан оҥоһуллубут киэргэллэр кэлбиттэр. Ол аата мастан, кумааҕыттан, тимиртэн, өстүөкүлэттэн оонньуурдарга болҕомтобутун уурарбыт ордук. Бу матырыйааллар айылҕаҕа буортуну аҕалбаттар, иккистээн туһаныллыахтарын сөп. Итиэннэ бэйэ оҥоһуктара өрүү сыаналаналлар, бырааһынньыкка ураты тыыны бэлэхтиэхтэрэ.
Дракон ураты көстүүнү уонна хорсун буолууну сэҥээрэр. Онон харыйабытын симиирбитигэр саарык оонньуурдары таһынан, дракон быһыылаах оонньуурдарынан, табыллыыны тардар малы-салы, көмүс манньыаттары, сыаналаах таастары иилиэххэ сөп.
Уоппут-күөспүт, тыаспыт-ууспут
Ол курдук, былырыын чааһынай дьиэлээхтэр кырыыһаларын бахрома гирлянданан симээбит, кутуу лабаалаах хойуу харыйаны атыылаһан, 200-300 миэтэрэлээх таммах быһыылаах гирлянданан эргиппит буоллахтарына, быйылгы балаһыанньа хайдаҕый?
Быйыл аны “хвойная лапа” дэнэр гирлянда атыыга киэҥник таҕыста. Ону кытта аны төлөпүөнүнэн салайыллар “вай-файдаах” гирляндалар баар буолбуттар. Гирлянданан харыйаны симээн баран, төлөпүөнтэн уотун өҥүн уларытыаххын, бытаардан-түргэтитэн, бэл муусука холбоон биэриэххэ сөп эбит. Бу гирляндалары удамыр сыанаҕа биллэр интэриниэт-маҕаһыыннартан сакаастаан ылыахха сөп.
Дракон уотунан уһуутуурун быһыытынан, харыйаны уот өҥнөөх кыһыллыҥы лиэнтэлэринэн, гирляндаларынан эрийиэххэ сөп.
Сүрүнэ – ис сүрэхтэн
Саҥа дьыл – дьиэ кэргэн бырааһынньыга. Дьиэни бары бииргэ ис сүрэхтэн өрө көтөҕүллэн, үөрэн-көтөн туран симиир бэйэтэ туспа эйгэни олохтуур. Сыллата тутуһар үтүө үгэстэри үөскэтии, оҕо аймахха умнуллубат күннэри бэлэхтиэҕэ дии саныыбыт.
Хас биирдии ыал бэйэтэ хайдах сөбүлүүрүнэн, тугу ордорорунан дьиэтин-уотун симээн, ураты алыптаах Саҥа дьылы көрсөргө бэлэм буоларгытыгар баҕарабыт.
Хаартыскалар: PXHERE СААЙТАН УОННА ААПТАР ТҮҺЭРИИЛЭРЭ.
Сообщить об опечатке
Текст, который будет отправлен нашим редакторам: