Өймөкөөн Томторугар Олоҥхо ыһыаҕар ыҥырыы килиибэ таҕыста

Өймөкөөн улууһугар ыытыллар  «Айыы санаа айана»  Олоҥхо Ыһыаҕын бэлиэлэринэн бухатыыр оҕо, Хорсун Хомпо Хотой уонна Лаби буолуохтара.

Улуус сахалыы тыллаах «Хотугу сардаҥа» хаһыата иһитиннэрбитинэн, уобарастары Өймөкөөн сирин үһүйээннэриттэн уонна олоҥхоттон сиэттэрэн оҥордулар. Уруһуйдьутунан Төрүт нэһилиэгиттэн төрүттээх  улуус киинин Уус-Ньара олохтооҕо, «Пегас» оҕо айымньытын сайдыытын киинин үлэһитэ Егор Неустроев буолла.

Бэлиэлэр суолталара: Бухатыыр оҕо — норуот инники көмүскээччитэ.  Хорсун Хомпо Хотой — күүстээх санаа, төрөөбүт дойдуга бэриниилээх буолуу.  Кырачаан Лаби — Луо балык оҕото, дьиктилээх Лабыҥкыр күөл үһүйээниттэн уонна хоту улуустар олоҥхолоруттан. Бу дьоруойдар  суолталаах тэрээһин бэлиэлэрэ буолан, Өймөкөөҥҥө ыытыллар Олоҥхо ыһыаҕар ыҥырыыга бэртээхэй ис хоһоонноох эрэкэлээмэ килиибэ таҕыста.

От ыйын 1 уонна 2 күннэригэр Тымныы полюһугар ыһыллар Олоҥхо ыһыаҕар  Өймөкөөн олохтоохторо ыҥыраллар!