Өймөкөөн урбаанньыттара улуус суолун тупсараллар

Бу күннэргэ Өймөкөөн улууһун Үчүгэй нэһилиэгин биир  кыахтаах урбаанньыта Мария Гарифуллина салайааччылаах дьиэ кэргэн биригээдэтэ Төрүт нэһилиэгин «Халыма» федеральнай суолу кытта холбуур суолу өрөмүөннээн, анал хамыыһыйаҕа туттарда.

— Улахан суолталаах инфраструктура биир бас бырайыагын бастакы түһүмэҕэ оҥоһуллан бүттэ. Бу үлэ уустук өрүттэрдээх этэ. Ол курдук, Гарифуллиннар иннилэринэ үлэлээбит бэдэрээччит ылыммыт эбэһээтэлистибэтин толорботоҕо. Онон оройуон дьаһалтата тустаах докумуону оҥоро охсон,  бу үлэни кыайыан сөптөөх эрэллээх толорооччуга көһөрөргө үлэлэспитэ. СӨ Суол пуондатын уонна оройуон бүддьүөтүн кыттыһыннаран (софинансирование), уопсайа 8 мөлүйүөн солкуобайдаах үлэ оҥоһулунна, — диэн бэлиэтиир улуус баһылыга Александр Оконешников.

Үчүгэй нэһилиэгин урбаанньыттара Гарифуллиннар дьиэ кэргэн кэлиҥҥи сылларга төрөөбүт улуустара сайдарыгар үгүс үлэни ыыттылар. Кинилэр ылсыахтара эрэ кэрэх — хаачыстыбалаах суол тыргылла тардыллар, тупсаҕай муоста дьэндэйэ түһэр.

— Биһиги дьиэ кэргэн сүрүннээн  улууспут суолларын оҥорууга үлэлэһэбит. Ол курдук, бу сылларга Сордоҥноох, Өймөкөөн, Төрүт суолларын оҥорууга ылыстыбыт. Иллэрээ сыл кылгас кэмҥэ “Кыһыҥҥы суол” статустаах Төрүт суолун чоҕу таһарга эрэ бэлэмнээн суол куппут эбит буоллахпытына, былырыын “Сылы эргиччи үлэлиир айан суола” статустаах суолу оҥорууга аукциоҥҥа кыайан, ыйы быһа үлэ араас көрүҥүн оҥорбуппут. Быйыл эмиэ бу суолу тупсарыыга олохтоохтук үлэлээтибит, — диэн кэпсиир урбаанньыт ыал ийэтэ уонна биригээдэ салайааччыта Мария Гарифуллина.

Былырыын Өймөкөөн нэһилиэгэр буолбут улахан халаан иэдээнин чөлүгэр түһэрии үлэтин саамай хорук тымырын — 45 км уһуннаах суол 21 сиринэн алдьаммыт «Томтор-Өймөкөөн» суолун өрөмүөнүн эмиэ Гарифуллиннар оҥорбуттара. Үчүгэй нэһилиэгин урбаанньыттара  улуус суолларын бэрт хаачыстыбалаахтык оҥороллорунан биллэллэр. Дэлэҕэ да, төрүттэр саҥа суолларын аспаалга тэҥнээн туран,  «былырыыҥҥы халааҥҥа Гарифуллиннар оҥорбут суоллара  бэркэ тулуспута» диэн үөрэ кэпсэтиэхтэрэ дуо?

— Быйыл Төрүккэ 11 килэмиэтир усталаах суол бэрт хаачыстыбалаахтык өрөмүөннэннэ. Үлэ бу көрүҥэ — бастакы түһүмэх. Өссө 11,5 килэмиэтири өрөмүүннүүр иккис түһүмэх үлэ барыаҕа. Эһиилги сылга үбүлээһиҥҥэ сайаапканы бэлэмнии сылдьабыт. Биһиги сүрүн сорукпут — Төрүт олохтоохторугар ханнык баҕарар күн-дьыл усулуобуйатыгар федеральнай суолга уонна оройуон киинигэр куттала суох, сыл устата айанныыр кыаҕы биэрии, — диэн санаатын үллэһиннэ улуус баһылыга Александр Оконешников.