Өймөкөөн Винокуровтарын үтүө бачыыма — бастыҥ холобур

Өймөкөөн улууһун бочуоттаах олохтоохторо, улуус убаастанар ытык ыала Василий, Маргарита Винокуровтар уонна кинилэр оҕолоро сүбэлэһэн баран, сыл аайы уйгулаах ыһыахха бэйэлэрин дьиэ кэргэттэрин аатыттан суолталаах бириэмийэни туттарыылара үгэскэ кубулуйда.

Ол курдук, Өймөкөөҥҥө ыытыллыбыт Олоҥхо ыһыаҕар Винокуровтар РФ үтүөлээх учууталыгар, улуус бочуоттаах олохтооҕор Мария Бояроваҕа, култуура управлениетын салайааччыта Аксинья Сивцеваҕа, Кыһыл көмүс сыбаайбаларын бэлиэтииллэригэр Москваҕа тиийэ саха атынан айаннаабыт Дугуйдан Винокуров төрөппүттэригэр Семен уонна Ирина Винокуровтарга 100-түү тыһыынча солкуобайдаах уу харчынан дьиэ кэргэн бириэмийэтин туттарбыттара. Маны таһынан, былырыын Өймөкөөн улууһа айылҕа иэдээнигэр түбэспитигэр  эмиэ харчынан, аһынан-таҥаһынан көмөлөспүттэрэ.  Бу үтүө дьыаланы оҥорор бачыымнарыгар махтанан туран, улуус баһылыга Александр Оконешников Винокуровтарга улуус дьаһалтатын кыраамататын туттарда.

Быйылгы ыһыахха Өймөкөөн улууһун олохтоохторун  төрүччүлэрин үөрэтэн, сүҥкэн суолталаах кинигэни бэчээккэ бэлэмнээн таһаарбыт кыраайы үөрэтээччи учуонай, биология наукатын кандидата  Спиридон Слепцовка Винокуровтар дьиэ кэргэн 100 тыһыынча солкуобайдаах бириэмийэ туттардылар.

Төрүччүнү үөрэтии — бу инникини түстүүр, омук быһыытынан чөл хаалыы мэктиэтэ. Учуонай Спиридон Слепцов сыралаах үлэтин түмүгэр күн сирин көрбүт кинигэ — аҥардас архыып докумуоннарын хомуйуу эрэ буолбатах. Бу хас биирдии ыал аанын арыйан, былыргы өбүгэлэрбит олохторун, кинилэр хорсун быһыыларын, үлэлэрин-хамнастарын, олоххо дьулуурдарын туһунан сэһэргиир сырдык кинигэ. Төрүччүнү үөрэтии ыччакка төрөөбүт дойдуга тапталы, киэн туттууну иҥэрэр. Киһи бэйэтин төрдүн-ууһун биллэҕинэ, кини өйө-санаата бөҕөргүүрүн, инникигэ эрэллээх буоларын сыаналаан туран, Спиридон Слепцовка Винокуровтар бэйэлэрин санааларын уурдулар. 

Маны таһынан, Маргарита Егоровна бэйэтин үөрэнээччитигэр, Өймөкөөн улууһугар Үчүгэй бибилэтиэкэтигэр айымньылаахтык үлэлиир Наталья Громоваҕа Култуура сылынан 100 тыһ. солк. уу харчынан туттарда. Тыа сирин бибилэтиэкэрэ нэһилиэгин чулуу дьонун олохторун, кыраайы үөрэтэр дириҥ ис хоһоонноох үлэни ыытар. Үчүгэй кулуубугар киирдэххэ, бу кыракый нэһилиэккэ олорон ааспыт үтүөкэннээх салайааччылар, табаһыттар, тырахтарыыстар, учууталлар тустарынан элбэҕи билэн тахсаҕын. Маргарита Егоровна үөрэнээччитигэр Наталья Громоваҕа  100 тыһ. солк. туттаран, кини үөрэх-билии, култуура нөҥүө эдэр дьону иитиигэ ураты болҕомтотун көрдөрдө. Ити курдук, учуутал уонна үөрэнээччи ситимэ, көлүөнэлэр утумнара салҕанар. Онон бу дьоһуннаах бириэмийэ бэйэтин хаһаайынын сөптөөхтүк булла.

Быйылгы ыһыахха ким эмэ биир дойдулаахтарыгар соһуччу бэлэҕи оҥорбута буолуо дуо? Өймөкөөн улууһун олохтоохторугар Василий уонна Маргарита Винокуровтар түһүлгэҕэ кэлбит хас биирдии киһиэхэ (!) дьиэ кэргэн стоматологиятын «Виват»  киинигэр 1 тыһ. солк.  сэртипикээти бэлэх ууннулар.  Норуоттар сомоҕолоһууларын сылынан Винокуровтар уоллара Степан бэйэтин табаарыстарын кэпсэтэн, Татарстан диаспоратын аатыттан узбек уолаттара астаабыт пловтарынан күндүлээн, Өймөкөөн түһүлгэтигэр араас омук дьоно түөлбэлээн олорор улуустарын тыына илгийдэ.

Онон быйылгы ыһыахха  кэлбит дьон минньигэс плову амсайан, сэртипикээт бэлэхтэтэн, улуустарын ыһыаҕын түһүлгэтиттэн  бэркэ дуоһуйан үөрэн-көтөн дьиэлээтилэр.

 

Биир дойдулаахтара Өймөкөөн күөрэгэйинэн аатырар  Агафья Готовцева ырыатынан үҥкүүлээн дайдылар.

 

Бэйэтин ырыаларын төрүттэр кийииттэрэ, аатырбыт мелодист Люция Бандерова-Айыллаана бэлэхтээтэ.

Баҕар, ким эмэ “бу биэнсийэҕэ олорор дьон хантан маннык үтүмэн харчыны сыл аайы бэлэх ууналларый?” диэн соһуйуон сөп.

— Киһи аҥаардас харчынан эрэ байан олорбот. Сүрүн баай – эн олоххор тирэнэр дьонуҥ, дьиэ кэргэниҥ, оҕолоруҥ, сиэннэриҥ. Ол иһин биһиги икки оҕобутун кытта сүбэлэһэн баран, дьиэ кэргэн бүддьүөтүттэн сылы быһа харчыбытыттан ордорунан, анаан мунньан төрөөбүт Өймөкөөннөрүгэр сүҥкэн кылааттарын киллэрэр, ол ону биир дойдулаахтара бары билэ сылдьар, киэн туттар дьонугар туттарабыт. Эмискэ иһиттэххэ 100 тыһ. солк. элбэх курдук. Биллэн турар, оччо харчыны тута ууран биэрэр кыаҕыҥ суох. Ол иһин уолбут Степан, кыыспыт Ольга бэйэлэрин хамнастарыттан, Василий Степанович уонна мин – биэнсийэбититтэн “бу — бириэмийэҕэ” диэн арааран мунньунабыт. Ол түмүгэ – ыһыахха уу харчынан бэриллэр сэртипикээт. Бу бириэмийэни туттараат, харчыбытын эмиэ салгыы мунньунан барыахпыт. Мин кэргэмминээн саҕалаабыт үтүө үгэспитин аны оҕолорбут, сиэннэрбит, хос сиэннэрбит салгыахтара. Биһиги холобурбутун улууспут олохтоохторо эрэ буолбакка, өрөспүүбүлүкэ дьоно-сэргэтэ  биирдиилээн да буоллар батыстахтарына, ыччаттарбыт «төрөөбүт улуустарыгар сүҥкэн өҥөлөөх киһи дьоһуннаах үлэтэ сыаналанар эбит» диэн киэн туттуохтара, бэйэлэрэ бу маннык үлэлээх дьоҥҥо тардыһыахтара, тэҥнэһэ сатыахтара, — диэн санаатын үллэһиннэ педагогическай наука кандидата Маргарита  Винокурова.

Маргарита Егоровна өр сылларга кэргэнэ Василий Степанович төрөөбүт дойдутугар Үчүгэйгэ оскуола дириэктэринэн, нэһилиэк баһылыгынан, киин куоракка көһөн кэлэн, учуонай быһыытынан учууталлар идэлэрин үрдэтэр институкка үлэлээбитэ. Уопсастыбаннай кэрэспэдьиэн быһыытынан хаһыаттарга, куйаар ситиминэн үлэлиир саайтарга суруйар уопуттаах  суруналыыс. Ол да иһин буолуо, олоххо актыыбынай позициялаах дьон, кэргэнинээн, экэнэмиичэскэй наука кандидата Василий Винокуровы кытта меценат быһыытынан  төрөөбүт Өймөкөөннөрүгэр дьоһуннаах кылааты оҥоро сылдьар дьону анаан бэлиэтии көрөн, маннык бэлиэ дьиэ кэргэн наҕараадатын туттараллар.

Василий уонна Маргарита Егоровна Винокуровтар дьиэ кэргэннэрэ бу курдук үтүө дьыаланы өйөөн, ыччакка патриотизм тыынын иитиигэ улахан хардыыны оҥордулар. Кинилэр 100 тыһыынча солкуобайдаах бириэмийэни туттаран туран, «Өймөкөөн чулуу дьонун холобурдарын батыһыҥ» диэн баҕа санаалара  аҥардас тыл эрэ буолбакка, дьыаланан бигэргэммит ыҥырыы. Винокуровтар дьиэ кэргэн үтүө бачыымнара урбаанньыттарга, меценаттарга уонна хас биирдии киһиэхэ — бастыҥ холобур.