Өлөөннөр красноярскайдарга, алданнарга табалары биэриэхтэрэ

Өлөөн улууһугар “Өлөөн” МУП исписэлиистэрэ хараалга тахсаары  бэлэмнэнэллэр. Ону тэҥэ Красноярскай таба хаһаайыстыбатыгар 200-чэ табаны биэриэхтэрэ. Алдан улууһа эмиэ биир итиччэни бу МУП-тан ылаары гынар. Ону таба ааҕыытын кэннэ төһөнү биэрэллэрин чопчулуохтара.

— Ол да буоллар бэйэбитигэр каадыр боппуруоһа сытыытык турар. Ордук Дьэлиҥдэ нэһилиэгэр ыччат “Анаабыр алмаастарыгар” ботуччу хамнаска үлэлиир  буолан, табаҕа үлэлииргэ эмиэ ирдэбиллэрэ үрдүк. Онон каадыр боппуруоһугар тыа хаһаайыстыбата  бырамыысыланнаһы кытта күрэстэһэргэ ыарахан соҕус. Дьиҥэ, биэс ыстааданы тэрийиэхпитин баҕарбыппыт да, табаһыппыт тиийбэт.  Хараал кэмигэр быһыыны биэрии ыытыллыаҕа. Бэтэринээрийэ управлениетын Өлөөн улууһугар салалтата (А.В.Николаева) бу боппуруоһу быһаарыыга үлэлэһэр. Маныаха 4,5 тыһ. табаҕа быһыы туруорарга 8 мөл солк. наада. Оччоҕуна бу ааспыт сайын кутталы үөскэтэ сылдьыбыт сыстыганнаах ринотрахеит тарҕамматын курдук үлэ барыахтаах.

Хараал кэнниттэн кулун тутар 22 күнүгэр Харыйалаахха уонна Дьэлиҥдэҕэ табанан сүүрдүү буолуоҕа.  Аны онно бэлэмнэнии күүтэр, — диир “Өлөөн” МУП зоотехнига Марина Николаева.