Элгээйи сириттэн эһиэкэй дьиэрэйдэ

Кулун тутар 16 күнүгэр Дьокуускай куоракка Өксөкүлээх Өлөксөй аатынан  Норуоттар доҕордоһууларын киинигэр Сунтаар улууһун  Элгээйи нэһилиэгэ тэриллибитэ – 255, П.Х. Староватов аатынан Элгээйи орто оскуолата арыллыбыта 150 сылынан улахан тэрээһин буолан, барыбыт сүргэбит көтөҕүлүннэ.

Элгээйилэр Дьокуускайга олорор биир дойдулаахтарын үөрдээри,  мэлдьи буоларын курдук, киэҥ ис хоһоонноох бырагыраамалаах кэлбиттэр.

Ол курдук, 16 чаастан талба талааннаах дьон уран оҥоһуктарын быыстапката, Элгээйи минньигэс астарын атыыта тэрилиннэ. Элбэх киһи элгээйилэр аатырбыт-сураҕырбыт бичиэнньэлэрин хамаҕатык  атыыласта.

Саха сиригэр сураҕырбыт үҥкүү тылын этээччилэр  оһуохай түһүлгэтин төрүттээтилэр. Дьон-сэргэ биир дойдулаахтарын кытары оһуохайдаһан, Угут Күөлгэ ыытыллар ыһыаҕы, Кыыл Уолун түһүлгэтин санаан ылла.

Киэҥ уораҕай иккис этээһигэр   “Элгээйи оскуолата” диэн дьоһуннаах (олус ыарахан ыйааһыннаах) кинигэ сүрэхтэннэ. Сүрэхтэниини Уйбаан Нуолур аатынан бибилэтиэкэ  сэбиэдиссэйэ Татьяна Семенова элгээйилии эҥээркэй куолаһынан киһи истэ эрэ олоруон курдук  ыытта.   Кинигэ сорох дьоруойдарын кэпсиир  дьүһүйүү-испэктээги көрдөрбүттэрэ олус сонун буолла. Ыалдьыттар маннык кинигэ күн сирин көрбүтүгэр, чуолаан сүрэхтэнии тэрээһинигэр,  Элгээйи оскуолатын дириэктэрэ София  Игнатьеваҕа, Элгээйи нэһилиэгин баһылыга Аркадий Самойловка махталларын эттилэр.  Аркадий Геннадьевич өссө  Элгээйи кинээһэ Дьүүл Уйбааны илэ бэйэтинэн толордо.  Оруолларга үксүгэр оскуола учууталлара, оҕолор оонньообуттара ордук итэҕэтиилээх буолла.

Дьэ, үс чаастан буолбут кэнсиэри көрө олорон, бу кыра нэһилиэккэ талба талаан элбэҕин, ол  талаан утумунан бэриллэн иһэрин, бииртэн биир дьэрэкээн көстүүмнэри сөҕө-махтайа көрдүбүт. Ансаамбыллар таҥастарын СӨ култууратын туйгуна Ульяна Самойлова тикпит.

“Эдэрдиин эмэнниин эриэккэс ырыалаах” диэн тыллардаах  Элгээйи туһунан ырыаны саалаҕа олорооччулар астына ылластылар.

Ханнык баҕарар кэнсиэр, тэрээһин  ыытааччылартан быһаччы тутулуктаах буолар. Сунтаардар, чуолаан элгээйилэр кыыстара Тускулаана Горохова-Кобельянованы билбэт киһи өрөспүүбүлүкэҕэ  аҕыйаҕа буолуо. Кэнсиэри куттуун-сүрдүүн, тас көстүүлүүн кэрэ киһини кытары эмиэ бэйэлэрин уоллара, Хоту дойдуга баран үлэлээн кэлбит Григорий Гурьев ыыттылар. Бу киэһэ кинилэр иккиэн СӨ култууратын туйгуннара буолалларын чахчы итэҕэттилэр. Кинилэр бу дьоро киэһэҕэ Сунтаар курдук ыраах сиртэн 125 киһи хас да тиэхиньикэнэн айаннаан кэлбитин  туһунан иһитиннэрбиттэригэр  көрөөччүлэр махталларын күүстээх ытыс тыаһынан биллэрдилэр.

Үлэ уонна сыана бэтэрээннэрин “Алаас ансаамбыла”,  СӨ култууратын үтүөлээх артыыстара Зоя уонна Афанасий Соловьевтар салайар «Бриллианты Якутии» уонна  «Алгыстаах доҕордоһуу» ансаамбыллара, Мария Семенова салайбыт, өрөспүүбүлүкэ таһыгар сураҕырбыт “Домисольки”,  «Дьүһүйүү», «Чөмчүүнэ», «Далбарай», «Нуурал»,  «Кэрэчээнэ», «Элькидс», «Оһуор», уо.д.а. ансаамбыллара бииртэн биир нүөмэрдэри көрдөрөн, көрөөччүлэр ырыа, үҥкүү абылаҥар куустардылар.

Элгээйи кулуубун сыанатын бэтэрээннэрэ:  СӨ норуотун хаһаайыстыбатын үтүөлээх үлэһитэ, Горнай улууһун бочуоттаах олохтооҕо Тамара Филиппова,  СӨ култууратын үтүөлээх үлэһитэ Анатолий Макаров (бэйэтэ уонна бииргэ төрөөбүттэрин кытары), СӨ доруобуйа харыстабылын туйгуна Светлана Афанасьева, Евгения Игнатьева, СӨ култууратын туйгуна Анастасия Михайлова-Дойдууна; элгээйилэр талааннаах кыыстара Айталина Крылова, СӨ гражданскай сулууспатын  туйгуна, Ил Түмэн аппараатын салайааччыта Мария Владимировна Попова уола Петр Ивановтыын, эстрада ырыаһыттара Алена Ядреева, Күннэй Алексеева, Дария Осипова-Дайа, Юана, Иван Кондратьев-Брус Баанньа,  Рома Авто, Аяна, Аян Поппороонньо Петровтар, Клавинна,  Юлия Ушницкая, «Кэрэ кэм» ырыа бөлөҕө, академическай куоластаах Мария Федорова, виртуоз-хомусчут Юлиана Кривошапкина-Дьүрүйээнэ, дириҥ далай куоластаах Карина Попова, мелодист  уонна ырыаһыт Григорий Попов уо.д.а. көрөөччүлэр сэҥээриилэрин ылыахтарын ыллылар. Кэнсиэр уус-уран салайааччыта Любовь Никитина, оператор, футаж — СӨ култууратын үтүөлээх үлэһитэ Владимир Семенов, Гаврил Иванов, Иннокентий Тытыгынаев.

Кэнсиэр кэмигэр  Элгээйи олохтоохторо уонна тэрилтэлэр кэлэктииптэрэ куоракка олорор биир дойдулаахтарыгар бириистэри  оонньоттулар.  Бириистэргэ  дойду аһа: куобах, сыалыһар, кус-хаас, үрүҥ ас, бурдук аһа, кууллаах хортуоска уо.д.а. бааллар.

Элгээйи талааннаах дьонунан дьэ, чахчы чаҕылхай эбиттэр.   Көрөөччүлэр: “Аны сайын үбүлүөйдээх  ыһыахха көрсүөххэ диэри күндү доҕоттоор!” – диэн дуоһуйан тарҕастылар.