Сэбиэскэй Сойуус Дьоруойа Федор Охлопков аатынан ыраах дистанцияҕа ытыыга төрдүс турнирга кыттарга түөрт дойду сайаапка биэрдэ. Бу туһунан Дьокуускайга РФ Бырабыыталыстыбатын Бэрэссэдээтэлин солбуйааччы – РФ бэрэсидьиэнин Уһук Илиҥҥи федеральнай уокурукка боломуочуйалаах бэрэстэбиитэлэ Юрий Трутнев тэрийэр кэмитиэт мунньаҕын түмүгүнэн иһитиннэрдэ.
«Турнир норуоттар икки ардыларынааҕы статустаныаҕа. Билиҥҥи туругунан түөрт дойду кыттыан баҕарарын биллэрдэ. Кэллигэлэрбит сайаапкаларын бигэргэттэхтэринэ, биһиги, биллэрин курдук, кинилэри ыҥырыахпыт. Мунньахха турнир норуоттар икки ардыларынааҕы таһымҥа толору эппиэттиирин уонна бэлэмнэнии үрдүк таһымҥа барарын туһунан боппуруостар дьүүллэһиннилэр», — диэтэ Юрий Трутнев.
«Байыаннай снайпинг» күрэхтэһии 2026 сыл алтынньытыгар «Сулус» кииҥҥэ буолуоҕа. Бу киин тэхиниичэскэй көрдөрүүлэринэн дойдуга биир саамай бастыҥ полигонунан ааҕыллар.
«“Сулус” киин аныгы инфраструктуралаах уонна дойду биир бастыҥ былаһааккатынан билиниллэр. Манна норуоттар икки ардыларынааҕы турниры ыытыы — эрэгийиэн бэлэмэ үрдүк таһымнааҕын туоһулуур. Ыччаттарга туспа турниры ыытар туһунан быһаарыы ураты суолталаах. Маннык күрэхтэһиилэр эппиэтинэстээх буолууну, дьиссипилиинэни, хамаанданан үлэлиир тыыны уонна дойду устуоруйатыгар ытыктабылы иитэллэригэр көмөлөһөллөр», — диэн бэлиэтээтэ Саха сирин Ил Дархана Айсен Николаев.
Турниры Арассыыйа байыаннай снайпинин федерацията, «ВОИН» киин уонна Саха сирин Бырабыытылыстыбата тэрийэллэр.
Мунньах түмүгүнэн 16–18 саастаах оскуола оҕолоругар кыра хамаанданан турниры ыытар туһунан быһаарыы ылылынна. Эрэгийиэннэр үстүү киһилээх сүүмэрдэммит хамаандалары туруоруохтара. Күрэхтэһии 22 LR калибрдаах кыра калибрдаах бинтиэпкэлэри туһанан ыытыллыаҕа.
«Бу тэрээһин оҕолору салгыы бэлэмнээһин өттүнэн олус сэргэх уонна суолталаах буолуоҕа диэн саныыбын», — диэн түмүктээтэ Юрий Трутнев.
Саха Өрөспүүбүлүкэтин Ил Дарханын уонна Бырабыыталыстыбатын пресс-сулууспата
Сиһилии: https://www.sakha.gov.ru/news/58218