Хаартыска: Елена Потоцкая.
Бүгүн Дьокуускайга ыытыллар Гражданскай пуорум иккис күнэ.
Инновационнай менеджмент үрдүкү оскуолатыгар Аҕа дойду Улуу сэриитигэр Кыайыы 80 сылыгар, Арассыыйаҕа Аҕа дойдуну көмүскээччи сылыгар, өрөспүүбүлүкэҕэ Ийэ дойдуну көмүскээччи сылыгар ананар “Көлүөнэлэр эстэпиэтэлэрэ: духуобунас, хорсун быһыы, эппиэтинэс” диэн былаһаакка кыттааччылара бэйэлэрин үлэлэрин уопутун атастастылар.
Мэҥэ Хаҥалас улууһун кииннэмит бибилэтиэкэ тиһигин дириэктэрэ Марианна Никанорова быйыл улуус салалтатын көҕүлээһининэн 34 туомнаах уопсастыбаннай-бэлитиичэскэй кинигэ таһаарбыттарын билиһиннэрдэ.
— Бырайыак салайааччыта, улуус баһылыга Дмитрий Тихонов улуус 31 нэһилиэгиттэн кыраайы үөрэтээччилэри, бибилэтиэкэрдэри, ытык кырдьаҕастары анаан түмэн, хамыыһыйаны үлэлэттэ. Ити улахан хамсааһын түмүгэр барыта 390 киһи кыттыыны ылла. Үлэбитин 2023 сыллаахха саҕалаабыппыт. Сүрүннээн нэһилиэктэринэн архыып чахчыларын хаһыспыппыт. Ол түмүгэр Аҕа дойду Улуу сэриитин сылларынааҕы архыып докумуоннарыгар олоҕуран, улахан энциклопедия-кинигэ күн сирин көрдө. Ол курдук, ааттара биллибэккэ сураҕа суох сүппүт 372 буойун аатын тилиннэ, сэриигэ 4198 киһи ыҥырыллыбыта билиннэ. Кинилэртэн 2136 киһи дойдутугар тыыннаах төннүбүт. Сэрии хонуутугар өлбүтүнэн уонна сураҕа суох сүппүтүнэн ааҕыллар 1913 киһи. 149 байыас аата билигин да биллибэт.
Улуус устуоруйатыгар олус улахан суолталаах кинигэ Новосибирскайга “Деал” типографияҕа бэчээттэнэн таҕыста. “Аҕа дойду Улуу сэриитин 1941-1945 сылларга Мэҥэ Хаҥалас улууһа” архыып докумуоннарыгар олоҕуран тахсыбыт быйыл балаҕан ыйын 3 күнүгэр Москватааҕы норуоттар икки ардыларынааҕы кинигэ дьаарбаҥкатыгар “Муниципальнай бибилэтиэкэ бастыҥ таһаарыыта” диэн анал номинацияҕа тигистэ. Биһиги бу уопуппутун атын улуустар холобур ылан олоххо киллэрэллэригэр эрэнэбит, — диэн пуорум кыттыылаахтарыгар бэйэтин санаатын тиэртэ Марианна Никанорова.
Маны таһынан Горнай улууһун Бэрдьигэстээҕиттэн уопсастыбанньыктар Валерий уонна Антонина Дьячковскайдар Аҕа дойду Улуу сэриитигэр санитар-ыттар хорсун быһыыларын туһунан ыыппыт тэрээһиннэрин кэпсээтилэр, Өлүөхүмэ улууһун кыраайы үөрэтэр мусуой дириэктэрэ Ирина Никифорова Өлүөхүмэ оройуонуттан сэриигэ барбыт дьон суруктарын туһунан кэпсээтэ, Үөһээ Бүлүүтээҕи Иван Семенов аатынан тыйаатыр режиссера «Саха Данкота» испэктээк туһунан кэпсээтэ. Ити курдук, “Көлүөнэлэр эстэпиэтэлэрэ: духуобунас, хорсун быһыы, эппиэтинэс” диэн былаһаакка кыттааччылара үгүс улуустан кэлэн, бэйэлэрин үлэлэрин уопутун атастастылар.
Саха сиригэр Службапоконтракту14.рф саҥа саайт нөҥүө хантараагынан байыаннай сулууспаҕа барааччылар сайаапка хаалларыахтарын сөп. Российскай Федерация Сэбилэниилээх…
Синоптиктар иһитиннэрэллэринэн, бүгүн, алтынньы 28 күнүгэр, өрөспүүбүлүкэ үксүгэр кыралаан, оттон хоту улуустарга сорох сирдэринэн хаар…
Өрөспүүбүлүкэ нэһилиэнньэлээх пууннара массыына кыһыҥҥы суола аһыллыар диэри ирдэнэр кээмэйдээх оттук-энэргэтиическэй саппааһынан олоччу хааччылыннылар. Бу…
«Күн бүгүн эрэгийиэн иһинээҕи көтүүлэри үбүлээһин өрөспүүбүлүкэ бүддьүөтүн суотугар эрэ ыытыллар. Бу сыалга 250 мөлүйүөн…
Арассыыйаҕа массыына атыылаһарга чэпчэтиилээх кирэдьииттээһин хас даҕаны судаарыстыбаннай бырагыраама үлэлиир. Ону туһанан саҥа массыынаны атыылаһыахха…
Бу күннэргэ Горнай улууһун Бэрдьигэстээх сэлиэнньэтин ыччаттара нэһилиэк сэбиэтэ тэриллибит күнүн бэлиэтээтилэр. Бу туһунан Бэрдьигэстээх…