Кэмпэндээйи тууһуттан — эр дьоҥҥо аналлаах мыыла

“Саха сирэ” хаһыат бэйэ бородууксуйатын оҥорон таһаарар дьону “Сатабыл” рубрикаҕа өрүү сырдатар.

Горнай улууһун Бэрдьигэстээҕин урбаанньыта Майя Винокурова  бииргэ төрөөбүт балтын Туяра Хабахованы кытта мыыла оҥоруутугар былырыыҥҥыттан ылсыбыттара.

“Айар үлэ буолан, араас толкуй үгүс. Эр дьон бырааһынньыгар бэлэмнэнэн, саха уоланнарыгар аналлаах мыыла араас көрүҥүн толкуйдуу сылдьабыт. Ол курдук, “гипергидроз” диэн эр киһи көлөһүнүн бохсор састааптаах мыыла оҥоһуллуоҕа. Онно Саха  сирин үүнээйилэрин арааһын, эбии кытыаны, харыйа иннэтин сурадыһыннарын эбиэхпит”, — диэн «Саха сирэ» хаһыакка санаатын үллэстибитэ урбаанньыт Майя Винокурова. Бу күннэргэ Горнай Бэрдьигэстээҕэр “Пуночка” айылҕа косметикатын оҥорор мастарыскыай эр дьоҥҥо анаан араас туһалаах мыылалары оҥорон таһаарда.

Ол курдук,  «Мохсоҕол» мыыла — элбэхтэ көлөһүннүрэр эр дьоҥҥо аналлаах. Хара үлэҕэ сылдьар, успуордунан дьарыктанааччыларга барсар. Маны тэҥэ, лоһуор оттон уонна Кэмпэндээйи тууһуттан, «Суор» — бактерициднай, кытыантан уонна чохтон, «Хаар эбэ» — харыйа иннэтин уутуттан киһи этин сымнатар,  «Уус илии» — баран биэрбэт кири ыытар, оҕунуох, арыы, кырааска, тимир уонна чох быылын мыылалара эр дьон болҕомтотун тардыахтара. «Эрэнэбин» — хатырар, дерматозтаах тириилээхтэргэ барсар ( псориаз, экзема, дерматит). Былыргы ырысыабынан — «Мохсоҕол» бытык хорунар мыыла. Бу мыылалары олунньу 21-22 күннэригэр «Дэлэй Моллтан» (урукку Айсберг) бэһис этээскэ ыытыллар дьаарбаҥкаттан кэлэн ылыахха сөп.