Классика уонна аныгы саундтрек. Култуура пуорума улахан мусукаалынай-театрализованнай туруоруунан түмүктэннэ

Саха Өрөспүүбүлүкэтигэр биллэриллибит Култуура сылыгар анаммыт  култуура пуорума Дьокуускайга кулун тутар 16-20 күннэригэр ыытылынна. Пуорум сүрүн соругунан уопуту атастаһыы, култуура кыахтарын сайыннарыы уонна бииргэ үлэлээһини бөҕөргөтүү буолла.

Кулун тутар 20 күнүгэр пуорум «Триумф» успуорт комплексыгар «Так звучит Якутия в Год культуры» мусукаалынай-театрализованнай туруоруунан түмүктэннэ. Манна өрөспүүбүлүкэ сүрүн айар кэлэктииптэрэ кытыннылар.
Пуорум кыттыылаахтарын уонна ыалдьыттары Ил Дархан Айсен Николаев:
«… Биһиги эпос сыыппаралаах технологиялары кытары  көрсүһэр, ускуустубаннай өй үгэстэри харыстыыр уонна сайыннарар үнүстүрүөмүнэн буолар баар чахчытын оҥоробут. Үгэстэрбит уонна духуобунай сыаннастарбыт, Олоҥхобут -– ааспыт кэм буолбатахтар, инникибит.
Биһиги нэһилиэстибэбитин харыстааһыны сэргэ, үгэстэри уонна аныгыны холбоон,  саҥа өйү-санааны иҥэрэрбит улахан суолталаах.
Култуура саҥа эратын киин бэлиэтинэн Эпос уонна ускуустуба Арктикатааҕы киинэ буолуоҕа. Киин Саха сирин үгүс өрүттээх култууратыгар уонунан сылларга суолу арыйыаҕа. Аныгы кэм уустуктарын уонна ыҥырыыларын өйдүүбүт. Ол гынан баран,  биһиэхэ санаа күүһэ баар -– түмсэргэ, инникибитигэр эппиэтинэһи ыларга дьулуур», — диэн эҕэрдэтин тириэртэ.
Бу күн Ил Дархан өрөспүүбүлүкэ судаарыстыбаннай наҕараадаларын туттарда:

«Саха Өрөспүүбүлүкэтин норуодунай артыыһа» бочуоттаах аат РФ култууратын үтүөлээх үлэһитэ, САССР үтүөлээх артыыһа Афанасий Федоровка;
«Саха Өрөспүүбүлүкэтин норуодунай худуоһунньуга» бочуоттаах аат РФ үтүөлээх худуоһунньуга Михаил Слепцовка.
А.Е.Кулаковскай-Өксөкүлээх Өлөксөй аатынан судаарыстыбаннай бириэмийэни «Күлүмнүүр таас» балет композитора, мусукаалынай кэллиэс преподавателэ Кирилл Герасимов, Суорун Омоллоон аатынан Опера уонна балет тыйаатырын дириэктэрэ, «Күлүмнүүр таас» балет либреттотын ааптара Владислав Левочкин ыллылар.

Саха норуотун устуоруйатын култууратын уонна аныгы кэмин тыктаран  көрдөрбүт «Так звучит Якутия в Год культуры» дьикти туруоруу Эллэй ыспыт Ыһыаҕыттан саҕаланна. Билиҥҥи уонна аныгы кэми көрдөрүү Арктика киинин тэрийиини кытары ситимнэннэ. Классика, биллэр ааптардар айымньылара уонна аныгы саундтректар экраҥҥа холбоһон, Саха сирэ баай култууралааҕын кэрэһилээтилэр.