Култуура миниистирэ айар куттаах дьиэ кэргэни кытта көрүстэ

2024 сылга үктэнээт, Айыыһыт, Дьиэ кэргэн уонна Оҕо саас сылларынан сибээстээн,  Саҥа дьыллааҕы уһун өрөбүл кэннилэриттэн саҕаламмыт саҥа үлэ күнүн култуура уонна духуобунас сайдыытын миниистирэ Афанасий Ноев Сунтаар улууһун ырыа куттаах Спиридоновтар дьиэ кэргэни кытта көрсүһүүттэн саҕалаата.

«Василий уонна Мария Спиридоновтар иккиэн СӨ култууратын үтүөлээх үлэһиттэрэ, култуура эйгэтигэр үлэлээбиттэрэ 30-тан тахса сыл буолла. Айар куттаах дьиэ кэргэн — үгүс ырыа ааптардара. Бордоҥ нэһилиэгин киэн туттар ыала култуура киинигэр үлэлииллэр. Быйыл кинилэр Арассыыйаҕа — Дьиэ кэргэн,  Саха сиригэр — Оҕо сылларыгар анаммыт үлэлэрин былаана киэҥ. Ол курдук, Спиридоновтар айар кэнсиэрдэрин, саҥа ырыа сүрэхтэниитин тэрийиэхтэрэ, бэйэлэрин иитиэхтии сылдьар ааптарскай бырайыактарын олоххо киллэриэхтэрэ.

Спиридоновтар дьиэ кэргэҥҥэ саҥа үүммүт сылга кытаанах доруобуйаны, дьолу-соргуну, айар үлэлэригэр өссө үрдүк ситиһиилэри баҕарабын», — диэн бэйэтин телеграм-ханаалыгар суруйар култуура уонна духуобунас сайдыытын  миниистирэ Афанасий Ноев.