Куукула тыйаатырын дьиэтэ өрөмүөннэннэ

Нерюнгри куоракка баар Өрөспүүбүлүкэтээҕи куукула тыйаатыра бу сыл бүтүөр диэри хапытаалынай өрөмүөн кэнниттэн, аанын тэлэччи арыйыаҕа. Өрөмүөнү «Култуура» национальнай бырайыак чэрчитинэн оҥордулар. Манна барыта 49,9 мөлүйүөн солкуобай көрүллүбүтэ.

Бу үпкэ дьиэ тас өттүн сылытар матырыйаалынан бүрүйдүлэр, саҥаттан эпсиэйдээтилэр, киирэр аанын, кирилиэһин уларыттылар, ититии систиэмэтэ, түннүктэрэ, сыана муостата уларыйдылар. Ис өттүн өрөмүөнүн үлэтэ салҕанар.

Бу дьиэ 1985 сыллаахха тутуллубут, онтон ыла улахан өрөмүөн ыытылла илик эбит. «Дьэ, билигин үлэлииргэ-хамсыырга, айарга-тутарга  бэртээхэй усулуобуйа баар буолла,» — диэн тыйаатыр дириэктэрэ, уус-уран салайааччыта Петр Скрябин этэр.

Тыйаатыр репертуарыгар 60-тан тахса испэктээк баар, сыл аайы премьера буолар. Быйыл кырачаан көрөөччүлэргэ «Играем в олонхо» (интерактивнай испэктээк), «Старуха Изергиль» (М.Горькай), «Тыйаатыр иччитэ» (С. Ермолаев) испэктээктэри туруоруохтара. Саҥа дьылга кырачааннар «Золушка» остуоруйаны көрүөхтэрэ.

«Култуура» национальнай бырайыак чэрчитинэн, Саха сиригэр кэнники 5 сылга 45 култуура эбийиэгэ тутулунна, 139 кулууп материальнай-тиэхиньиичэскэй баазата тубуста, 19 дьиэҕэ хапытаалынай өрөмүөн оҥоһулунна, 14 модельнай бибилэтиэкэ баар буолла, 18  ускуустуба оскуолалара үнүстүрүмүөннэринэн хааччылыннылар, 5 автокулууп ылылынна. Онон 2019 сылтан дьон култуурунай тэрээһиннэргэ сылдьыыта 1,6 төгүл улаатта. Холобур, 2022 сылга 19,5 мөлүйүөн төгүл сылдьыбыттар.