Миэбэл оҥорор урбаанньыты туттулар

ИДьМ пресс-сулууспата иһитиннэрбитинэн, Дьокуускайга миэбэл оҥоруутунан дьарыктанар урбаанньыты туппуттар.

Ол курдук, куорат олохтоохторо миэбэл оҥоттороору сакаас биэрбиттэр, дуогабардаспыттар уонна төлөбүр аҥаарын эрдэ төлөөбүттэр. Ол эрээри бэдэрээччит сибээстэн сүтэн хаалбыт, ол түмүгэр дьон миэбэлэ да, харчыта да суох хаалбыт. Эмсэҕэлээбит дьон тута полицияҕа үҥсүбүттэр. Полиция холуобунай ирдэбилин үлэһиттэрэ 26 саастаах уорбаланааччыны Самарскай уобаласка саһа сылдьарын булбуттар. Кинини Дьокуускайга төттөрү аҕалбыттар. Арассыыйа Федерациятын холуобунай кодексатын 159 ыст. 2 ч.  холуобунай дьыала тэриллибит. CORCRAFT_YKT фирмаҕа албыннаппыт эмсэҕэлээччилэри полицияҕа 89142801868 нүөмэргэ эрийэн сибээстэһэргэ ыҥыраллар.