«Мобильнай  дуоктардар» Сэбээн Күөлгэ үлэлээтилэр

«Мобильнай  дуоктардар»  Кэбээйи улууһун саамай ыраах сэлиэнньэтигэр — Сэбээн Күөлгэ бу күннэргэ үлэлээтилэр. 

«Бу ыраах сытар сэлиэнньэҕэ барарбытын тэрийиигэ күүс-көмө буолбут «Арассыыйа ийэлэрэ» түмсүү Саха сиринээҕи салаатыгар махтанабыт. Санатан эттэххэ, туһааннаах бырайыагы Ил Дархан  Айсен  Николаев көҕүлээн, АЛРОСА хампаанньа, СӨ Доруобуйа харыстабылын министиэристибэтин уонна Уопсастыбаннай доруобуйа уонна мэдиссиинискэй профилактика киинин өйөбүллэринэн  «Доруобай ийэ — доруобай оҕо» бырайыак иитинэн үлэлиир», –  диэн Доруобуйа харыстабылын министиэристибэтэ иһитиннэрдэ.

Мобильнай биригээдэ састаабыгар Саха сиринээҕи онкологическай  диспансер  хирург-онколога   Анна Иннокентьева уонна Уопсастыбаннай доруобуйа уонна мэдиссиинискэй профилактика киинини  быраастара:  кардиолог Елена Владимирова, УЗИ бырааһа  Лена Ушницкая, гинеколог Валентина Михайлова үлэлээтилэр. Маны таһынан эмчиттэри кытары «Арассыыйа ийэлэрэ» түмсүү Саха сиринээҕи салаатын чилиэннэрэ координатор  Яна Никитина салайыытынан сылдьыстылар.

«УЗИ бырааһа 148  киһини, кардиолог-быраас  – 89, онколог – 64, гинеколог-быраас  79 киһини көрдүлэр.  Көрүү түмүгүнэн 11 киһиэхэ Дьокуускайга салгыы баран көрдөрүнэллэригэр направление бэрилиннэ», – диэн Сэбээн Күөл быраас  амбулаториятын сэбиэдиссэйэ  Елена Кривошапкина кэпсээтэ.