Москваҕа Саха Өрөспүүбүлүкэтин төрүттээччилэри кэриэстээтилэр

Москваҕа «Коммунарка» урукку НКВД полигонугар Саха Өрөспүүбүлүкэтин Судаарыстыбаннаһын күнүгэр анаммыт миитиҥҥэ  биир дойдулаахтарбыт өрөспүүбүлүкэни төрүттээбит чулуу дьоммутун кэриэстээн аастылар.

2002 с. манна бэлитииичэскэй репрессия сиэртибэтэ буолбут – Саха сирин олохтоохторугар аналлаах мемориал турар. Хара гранит тааска көмүс буукубаларынан, ол ааспыт алдьархайдаах ыар тыыннаах кэмҥэ репрессияламмыт М.К.Аммосов, И.Н.Барахов, С.Н.Донской, Г.В.Ксенофонтов, К.О.Гаврилов, Х.П.Шараборин уо.д.а. Саха сирин уһулуччулаах диэйэтэллэрин аата түһэриллибит.  2022 с. Саха АССР 100 сылыгар пааматынньык саҥатытыллыбыт.

Миитиҥҥэ Саха сирин бастайааннай бэрэстэбиитэлистибэтин үлэһиттэрэ, бэтэрээннэр уонна устудьуоннар кытыннылар. Саха сирин бастайааннай бэрэстэбиитэлин эбээһинэһин толорооччу Александр Сафронов, Саха сирин түмсүүтүн салайааччытын солбуйааччы Людмила Павлова, Лена Максимовна Аммосова кэргэнэ профессор Владимир Гольдберг уонна «АйТал» ыччат хамсааһынын лиидэрэ Даниил Попов бэйэлэрин тыл этиилэригэр Саха Өрөспүүбүлүкэтин төрүттээччилэр тустарынан патриотическай өйдөбүлү  умнуо суохтаахпытын, кинилэри мэлдьи кэриэстиэхтээхпитин эттилэр диэн иһитиннэрэр СӨ Баһылыгын уонна бырабыыталыстыбатын пресс-сулууспата.