Хаартыска: “Нам улууһа” МО пресс-сулууспата
Бэҕэһээ Нам улууһун Кыһыл Дэриэбинэтигэр «Хатыҥ-Чараҥ» пааркаҕа доруобуйаларынан хааччахтаах дьон өрөспүүбүлүкэтээҕи бэстибээллэрэ ситиһиилээхтик, өрө көтөҕүллүүлээхтик түмүктэннэ.
Тэрээһиҥҥэ Намтан, Алдантан, Тааттаттан, Мэҥэ Хаҥаластан, Горнайтан, Хаҥаластан, Уус Алдантан, Амматтан, Чурапчыттан уонна Дьокуускай куораттан 13 хамаанда, уопсайа 220-тэн тахса киһи көхтөөх кыттыыны ылла.
Икки күн устата кыттааччылар спортивнай күрэхтэргэ — хабылыкка, хаамыскаҕа, быа эрийиитигэр, корнхоллга, классическай дартска уонна көрбөт уонна мөлтөхтүк көрөр дьон анал лазернай дартс көрүҥэр, городки күрэхтэригэр бастыҥы быһаарыстылар, ону сэргэ айар талааннарын вокалга уонна үҥкүүгэ көрдөрдүлэр.
Тэрээһин үөрүүлээх сабыллыытыгар Нам улууһун баһылыгын социальнай боппуруоска солбуйааччыта Юрий Дьяконов уонна Бүтүн Арассыыйатааҕы инбэлииттэр уопсастыбаларын Саха сиринээҕи салаатын бэрэссэдээтэлин солбуйааччы эҕэрдэ тылларын тиэртилэр.
Бэстибээл Саха сирин уһулуччулаах судаарыстыбаннай уонна бэлитиичэскэй диэйэтэлэ И. Е. Винокуров сырдык аатын үйэтитиигэ биир бэлиэ тэрээһин буолла.
Нам улууһун баһылыгын солбуйааччы Юрий Дьяконов, улуус дьаһалтатын дьиэ кэргэн уонна ыччат отделын үлэһиттэрэ, улуустааҕы доруобуйаларынан хааччахтаах дьон уопсастыбаннай тэрилтэтин бэрэссэдээтэлэ Марина Литвинова уонна улуус адаптивнай спортка исписэлииһэ Людмила Собакина, уопсастыба нэһилиэктэрдээҕи салаалара үс күннээх тэрээһиҥҥэ сүүрэн-көтөн, кэлбит хамаандаларга сөптөөх усулуобуйа тэрийэн, бэстибээл үрдүк таһымҥа ыытылынна. Күрэхтэһии сүрүн судьуйатынан улуустааҕы физическэй култуура уонна спорт управлениетын исписэлииһэ Евгений Сивцев ситиһиилээхтик үлэлээтэ.
Хамаандалар ыраахтан-чугастан тэринэн кэлэннэр, итиини, куйааһы, ыраах айан сылаатын аахсыбакка икки күн тыҥааһыннаахтык күрэхтэһэн, атастыын-доҕордуун ахтыспыт санааларын үллэстэн, дуоһуйан астынан бардылар. Ким үчүгэй дьарыктаах, ол кыайыы кынаттанна.
Уопсай түмүккэ бары кыттыбыт хамаандалары кыайыылааҕынан тахсыбыттарын туһунан иһитиннэрдилэр.
Хамаандалар ЯРО ВОИ туруорбут сыаналаах бириистэринэн, РЦАФКиС туоһу суруктарынан, мэтээллэринэн наҕараадаланнылар. Хамаандалар салайааччыларыгар, доруобуйаларынан хааччахтаах дьон улуустардааҕы уопсастыбаннай тэрилтэлэрин бэрэссэдээтэллэригэр, судьуйаларга, тэрийээччилэргэ өйдөбүнньүк бириистэр, махтал суруктар туттарылыннылар.
Бэстибээл Вера Цыпандина-Куличкина таһаарыытыгар оһуохайынан түмүктэннэ.
Тэрийээччилэр бары күүс-көмө буолбут дьоҥҥо – ыалдьыттары көрсүһүүнү, олохсутууну тэрийсибит улуус нэһилиэктэрин дьаһалталарыгар, спонсордарга барҕа махталларын тиэрдэллэр.
Бэстибээл кыттыылаахтарыгар кэлэр сылга өссө үчүгэйдик дьарыктанан, доруобуйаларын бөҕөргөтүнэн үрдүк чыпчааллары дабайа туралларыгар баҕарабыт. Хаһан да кыайыыга дьулуургут, күүстээх санааҕыт саппаҕырбатын.
“Нам улууһа” МО пресс-сулууспата
Өрөспүүбүлүкэ нэһилиэнньэлээх пууннара массыына кыһыҥҥы суола аһыллыар диэри ирдэнэр кээмэйдээх оттук-энэргэтиическэй саппааһынан олоччу хааччылыннылар. Бу…
«Күн бүгүн эрэгийиэн иһинээҕи көтүүлэри үбүлээһин өрөспүүбүлүкэ бүддьүөтүн суотугар эрэ ыытыллар. Бу сыалга 250 мөлүйүөн…
Арассыыйаҕа массыына атыылаһарга чэпчэтиилээх кирэдьииттээһин хас даҕаны судаарыстыбаннай бырагыраама үлэлиир. Ону туһанан саҥа массыынаны атыылаһыахха…
Бу күннэргэ Горнай улууһун Бэрдьигэстээх сэлиэнньэтин ыччаттара нэһилиэк сэбиэтэ тэриллибит күнүн бэлиэтээтилэр. Бу туһунан Бэрдьигэстээх…
Сэтинньи 4-6 күннэригэр Дьокуускайга Сомоҕолоһуу күнүгэр аналлаах норуот уус-уран оҥоһуктарыгар босхо маастар-кылаастары ыытыахтара. Тэрээһини «Мин…
Өлүөнэ муостатын тутар былаһааккаҕа өрүс флотун муус туруон иннинээҕи үлэтэ түмүктэннэ. Ааспыт сезон устата 20-чэ…