Ньурбаҕа алта уонна онтон элбэх оҕолоох дьиэ кэргэттэргэ 1 мөлүйүөнү аныахтара

Арассыыйаҕа Дьиэ кэргэн уонна Саха сиригэр Оҕо саас сыла Ньурбаҕа бэлиэ түгэнинэн саҕаланна.

Ыам ыйын 3 күнүгэр Ньурба  оройуоннааҕы Сэбиэтин дьокутааттара алтыс сиэссийэҕэ «Ньурба ыала» диэн муниципальнай биир кэмнээх төлөбүр туһунан саҥа балаһыанньаны бигэргэттилэр.

Бу төлөбүр алта уонна онтон элбэх оҕолоох дьиэ кэргэттэргэ ананар. Төлөбүр суумата 1 мөлүйүөн солкуобайга диэри тиийиэн сөп диэн Ньурба  оройуоннааҕы дьокутааттарын Сэбиэтин пресс-сулууспата иһитиннэрдэ.

Ону сэргэ дьокутаттар «Ньурбатааҕы ийэ хапытаала» төлөбүрдэри салгыы сөргүтэргэ быһаардылар. Төлөбүр суумата 100 тыһ. солк. тэҥнэһэр. Ирдэбилэ —  төрдүс оҕо төрөөтөҕүнэ уонна онтон кэнники оҕолорго ананар. Саҥа өйөбүл бу сылтан олоххо киириэҕэ.