Оҕо төрөөбүтүн туһунан туоһу сурукка гражданство туһунан бэлиэтээһини туруоруохтара

Бу сыл ыам ыйыттан оҕо төрөөбүтүн туһунан туоһу сурукка  гражданство туһунан туоһулуур бэлиэтээһини туруоруохтара.

Бу туһунан РФ Тас дьыалаларга министиэристибэтэ ылыммыт бирикээһэ ыам ыйын 7 күнүттэн күүһүгэр киирдэ. Бу иннинэ 14-гэр диэри саастаах оҕолору кыраныысса таһыгар таһаарыы быраабылата эмиэ уларыйбыта. Ол курдук, ирдэбил быһыытынан киирбит бэлиэ суох буоллаҕына, оҕолору кыраныысса таһыгар таһаарыа суохтара.

Маннык Арассыыйа гражданствотын туоһулуур бэлиэтээһини төрөппүттэн биирэ Арассыыйа гражданина буоллаҕына, 14-гэр диэри саастаах оҕо төрөөбүтүн туһунан туоһу сурукка кэлин өттүгэр туруоруохтара. Оттон оҕо тас дойдуга төрөөбүт түгэнигэр, Арассыыйа гражданствотын туһунан бэлиэни нотариальнайдык бигэргэппит тылбааһыгар туруоруохтара диэн «Госуслуги» порталга санаттылар. Туһааннаах бэлиэни миграция боппуруостарыгар ИДьМ территориальнай подразделениеларыгар, ону тэҥэ РФ дипломатическай бэрэстэбиитэлистибэтигэр эбэтэр тас дойдуларга консульствоҕа туруоруохтара. Онуоха төрөппүттэртэн сайабылыанньа суруллуохтаах.

Ирдэнэр докумуоннар:

• төрөппүттэр пааспардара,
• оҕо төрөөбүтүн туһунан туоһу сурук эбэтэр нотариальнайдык бигэргэммит тылбаас докумуона,
• оҕо сокуоннай бэрэстэбиитэлин быраабын туоһулуур докумуон.