Олоҥхо дьиэлэрин үлэһиттэрэ түмсэллэр

Кулун тутар 20 күнүгэр Арчы дьиэтигэр Өрөспүүбүлүкэтээҕи култуура пуорумун чэрчитинэн, Олоҥхо дьиэлэрин үлэһиттэригэр сэминээр буолла.

Өрөспүүбүлүкэҕэ 10 Олоҥхо дьиэтэ баар. Кинилэр биир ситимҥэ киирэн, олоҥхону, фольклору, төрүт үгэстэри үйэтитиигэ, духуобунаһы сайыннарыыга айымньылаахтык үлэлии-хамсыы сылдьаллар. Бу күннэргэ Олоҥхо дьиэлэрин үлэһиттэрэ түмсэн, уопут атастастылар, ырытыстылар, үөрэннилэр, сүбэлэстилэр. Сэминээргэ култуура миниистирэ Афанасий Ноев кыттыыны ылла.

— Култуура пуорумун үчүгэйдик түмүктээн эрэбит. Инники үлэбитин торумнаатыбыт. Култуура күнүгэр Арассыыйа култуураҕа миниистирин кытта көрсүөхтээхпин. Кэпсэтэр, туруорсар боппуруоспут элбэх. 50 мөлүйүөн көрүллүөхтээх диэн буолбута, Ил Түмэҥҥэ киирбитэ. Төһө да балаһыанньа уустук буоллар, Олоҥхо ыһыаҕын ыытыахпыт. Сэбээн-Күөллэр кэлэн, эбээн эпоһын көрдөрүөхтээхтэр, суол-иис уустугун аахсыбакка туран. Эһигини Кэбээйилэргэ күүс-көмө буолуҥ диэн ыҥырабын, — диэн бэлиэтээн эттэ.

Илья Николаевич, Кэбээйи улууһун дьаһалтатын култуураҕа салаатын салайааччы:

— Кэбээйигэ маннык улахан тэрээһин аан бастаан ыытыллар. Кэбээйи улуус киинэ буолбатах, кыһыннары-сайыннары суоллаах соҕотох нэһилиэк буолар. Атын нэһилиэктэр суоллара-иистэрэ уустук. Ол эрээри, Дьокуускайтан 5-6 чааһынан тиийиэххэ сөп.

Галина Самойлова, Сунтаар улууһун методическай киинин салайааччы:

— 2023 с Андрей Борисов көҕүлээбит »Түмүү» диэн сугулааҥҥа эспиэр быһыытынан сылдьыбытым, этии киллэрбитим. Олоҥхо дьиэлэригэр методист тиийбэт. Бу штаты таһаара сатыахха наада, — диэн туран, салгыы үлэлииргэ элбэх сүбэни-аманы биэрдэ.

»Биһиги фольклорга талааннаах дьоммутун түмэ тардан, айымньылаахтык үлэлиирбитигэр бириэмэ тиийбэт. Тоҕо диэтэр, күннэтэ кулууп үлэтигэр, дьону сынньатар үлэҕэ тарда тураллар. Үйэлээх үлэ тахсыбат», — диэн этиннилэр. Манна сорох улуустар уопуттарын аҕаллылар. Кинилэр туспа отдел тэрийэллэр, култуура атын үлэтигэр аралдьыппаттар эбит. Маны тэҥэ, улуустар бэйэ-бэйэбитигэр ыалдьыттаһан, үлэбитин сиһилии билсиэххэ, байытыһыахха, миэстэтигэр уопут атастаһыахха, ситиммитин бөҕөргөтүөххэ диэн этии киирдэ.