Хаартыска: Людмила Попова.
Орто үөрэххэ туттарсааччыларга анаан, өрөспүүбүлүкэ үөрэҕин тэрилтэлэрэ Дьокуускай куорат Доҕордоһуу болуоссатыгар муһуннулар.
Бу күн өрөспүүбүлүкэ 32 орто үөрэҕин тэрилтэтэ кэлэн үөрэххэ туттарсааччылары кытта үлэлэстэ. Тэрийээччилэр иһитиннэрбиттэринэн, күн устата 843 сайабылыанньа киирбит, итинтэн 213 докумуон дьиҥнээҕэ (оригинал) буолар.
Тэрээһин аһыллыытыгар Үөрэх уонна билим миниистирэ Нюргуна Соколова: “Биһиги өрөспүүбүлүкэбит 9-с, 11-с кылааһын бүтэрээччилэрэ бүддьүөт миэстэтинэн хааччыллалларын туһугар сыаллаах-соруктаах үлэни ыытар. Бу оҥоһуу өй, пилота суох көтөр аппараат, тэрилтэлэргэ киирэр аныгы технологиялар курдук үөрэх саҥа бырагыраамалара буолаллар.
Ил Дархан Айсен Сергеевич Николаев сорудаҕынан, сотору кэминэн 9-с кылааһы бүтэрээччилэргэ бүддьүөт миэстэтин эбэргэ аналлаах түһүмэҕинэн киирэр былааны ылыныахпыт.
Өскөтүн былырыын өрөспүүбүлүкэ кэллиэстэригэр, тиэхиньикумнарыгар үөрэххэ туттарсааччылартан 10 тыһыынчанан элбэх сайабылыанньа киирбит эбит буоллаҕына, билигин номнуо 41 тыһ. сайабылыанньаҕа тиийдэ. Тутар хампаанньа салгыы барар. Быйыл Хотугулуу-Илиҥҥи федеральнай университекка 4 тыһ. элбэх сайабылыанньа киирдэ. Онон өрөспүүбүлүкэ үрдүк, орто үөрэхтэрин дьон сэҥээрэрэ көстөр” – диэн эттэ.
Бу курдук тэрээһин Дьокуускайга сыллата ыытыллар. Үөрэх тэрилтэлэрин таһынан Ыччат каадырга киинин, үлэ биэрээччилэр бэрэстэбиитэллэрэ кытыннылар. Онон үөрэххэ туттарсааччылар үөрэххэ, үлэҕэ сыһыаннаах туох баар сэҥээрэр ыйытыыларыгар сиһилии хоруйдары ыллылар, сөбүлээбит идэлэригэр тута миэстэтигэр докумуоннарын туттардылар.
Нэһилиэнньэ дьарыктаах буолууга судаарыстыбаннай кэмитиэтин бэрэссэдээтэлин эбээһинэһин толорооччу Анастасия Позднякова: “Быйыл орто үөрэхтэргэ 300-тэн тахса тус сыаллаах миэстэ баар. Өрөспүүбүлүкэбитигэр ханнык ирдэнэр идэлэр баалларын көрөбүт. Оҕолор инникитин быраактыкаланар сиринэн, үлэнэн хааччыллалларын туһугар идэни сөпкө, толкуйдаан талалларыгар сүбэлиибин” – диэн бэлиэтээтэ.
Бэрдьигэстээх орто оскуолатын бүтэрбит Вероника, Авиата: “Оскуолаҕа бииргэ үөрэммиппит. Эрдэттэн орто үөрэххэ киириэхпит диэн сыаллаах-соруктаах этибит, онон биир кэлим эксээмэҥҥэ булгуччулаах биридимиэттэргэ эрэ эксээмэни туттарбыппыт. Дьокуускайдааҕы өҥө технологическай тиэхиньикумугар туризм уонна гостеприимство, Дьокуускай куораттааҕы педагогическай кэллиэс оскуола иннинээҕи үөрэхтээһиҥҥэ идэлэрин сэҥээрэбит” – диэн санааларын үллэстэллэр.
Санатан эттэххэ, 2026-2027 үөрэх дьылыгар туттарсааччылартан эбии тургутуулаах идэлэргэ сайабылыанньаны атырдьах ыйын 10 күнүгэр диэри, онтон атын идэлэргэ атырдьах ыйын 15 күнүгэр диэри ылаллар.
Өрөспүүбүлүкэ нэһилиэнньэлээх пууннара массыына кыһыҥҥы суола аһыллыар диэри ирдэнэр кээмэйдээх оттук-энэргэтиическэй саппааһынан олоччу хааччылыннылар. Бу…
«Күн бүгүн эрэгийиэн иһинээҕи көтүүлэри үбүлээһин өрөспүүбүлүкэ бүддьүөтүн суотугар эрэ ыытыллар. Бу сыалга 250 мөлүйүөн…
Арассыыйаҕа массыына атыылаһарга чэпчэтиилээх кирэдьииттээһин хас даҕаны судаарыстыбаннай бырагыраама үлэлиир. Ону туһанан саҥа массыынаны атыылаһыахха…
Бу күннэргэ Горнай улууһун Бэрдьигэстээх сэлиэнньэтин ыччаттара нэһилиэк сэбиэтэ тэриллибит күнүн бэлиэтээтилэр. Бу туһунан Бэрдьигэстээх…
Сэтинньи 4-6 күннэригэр Дьокуускайга Сомоҕолоһуу күнүгэр аналлаах норуот уус-уран оҥоһуктарыгар босхо маастар-кылаастары ыытыахтара. Тэрээһини «Мин…
Өлүөнэ муостатын тутар былаһааккаҕа өрүс флотун муус туруон иннинээҕи үлэтэ түмүктэннэ. Ааспыт сезон устата 20-чэ…