Пеледуй таһыгар уу таһыма

Ленскэй улуус Пеледуй бөһүөлэгэр Өлүөнэ кытылыгар уу таһыма кутталлаах бэлиэни аһарбат. Ол туһунан Ленатааҕы уу управлениетын салайааччы Петр Аргунов бүгүн брифиҥҥэ иһитиннэрдэ.

«Ыам ыйын 5-7 күннэригэр муус баттыга бэлиэтэммитэ, ол бүгүн олохтоох бириэмэнэн 7.15 чааска хамсаата. Уу таһыма 10 м 99 см (кутталлаах таһыма 12 миэтэрэ)», -– диэтэ Петр Аргунов.

Нүүйэ өрүскэ муус аллараа кытыыта Ленскэй улуус Бэчинчэ сэлиэнньэтин аннынан барар. Орто Наахаранан муус тохтуу-тохтуу устар. Уу таһыма 8 м 45 см (кутталлаах таһыма 10 миэтэрэ).
Ыам ыйын 6 күнүгэр киэһэ Өлүөхүмэ өрүс Дьиикимдэ гидропост таһынан аһылынна, муус хойуутук устар. Чугастааҕы сууккаҕа муус хамсыыра Куду Күөл гидропост таһынан күүтүллэр. Өлүөхүмэ өрүс уҥа салаатыгар Тээнэ өрүскэ муус бытааннык барар.

СӨ Ил Дарханын уонна бырабыыталыстыбатын пресс-сулууспата