Хаартыска: Айсен Николаев МАХ ханаалыттан
Санкт-Петербургтааҕы норуоттар икки ардыларынааҕы экэниэмикэ пуорум үһүс күнэ саҕаланна. Бэҕэһээ Саха сирин сайдыытыгар улахан суолталаах хас даҕаны сөбүлэһиигэ илии баттанна диэн Ил Дархан Айсен Николаев МАХ-ханаалыгар иһитиннэрэр.
«МТС Медиа» ХЭУо кытта медиа, киинэ уонна тэлэбиидэнньэ оҥорон таһаарыытын эйгэтигэр бииргэ үлэлэһии туһунан сөбүлэһии түһэрсилиннэ. Бу — Саха киинэтин уонна креативнай индустриялары федеральнай цифровой платформаларга киэҥник тарҕатар, саҥа бырайыактары сайыннарар соруктаах.
«Западная» АУо кытта үлэһиттэр дьиэ кэргэттэригэр «демографияны өйөөһүн кыһыл көмүс стандарта» диэн корпоративнай бырагырааманы киллэрии туһунан кэпсэтии барда. Бу бырагыраама оҕолоох дьиэ кэргэттэргэ эбии өйөбүлү, оҕо инфраструктуратын сайыннарыыны уонна элбэх оҕолоохторго социальнай мэктиэлэри кэҥэтиини көрөр.
Челябинскай уобалас Бырабыыталыстыбатын кытта эргиэн-экэниэмикэ, билим-тиэхиньикэ, социальнай уонна култуурунай хайысхаларга бииргэ үлэлэһии туһунан сөбүлэһии түһэрсилиннэ. Докумуон икки эрэгийиэн икки ардыгар саҥа уопсай бырайыактары олоххо киллэрэр кыаҕы биэрэр.
ДОМ.РФ уонна «Селигдар» хампаанньа кытта Алдаҥҥа корпоративнай аренднай дьиэни тутуу бастакы бырайыагын олоххо киллэрии туһунан дуогабардастылар. Бу Арассыыйаҕа маннык ИЖС форматынан бастакы бырайыак буолар. Бырайыак иитинэн социальнай инфраструктуралаах олорор бөһүөлэк тутуллуоҕа. Хампаанньа үлэһиттэрэ дьиэни уларсан баран, кэнники атыылаһар кыахтаныахтара. Бу — Саха сиригэр исписэлиистэри тардар уонна олохсутар дьоһуннаах ньыма.
Арассыыйа Тас дойдулар дьыалаларыгар министиэристибэтин Москватааҕы судаарыстыбаннай институтун (МГИМО) кытта каадырдары бэлэмнээһиҥҥэ бииргэ үлэлэһии туһунан сөбүлэһии түһэрсилиннэ. Бу ыччаппыт үөрэнэр уонна идэлэрин үрдэтэр, өрөспүүбүлүкэлэрин уонна дойдуларын аан дойду таһымыгар көмүскүүр кыахтаах исписэлиис буоларга эбии кыаҕы биэриэҕэ.
МГИМО ректора Анатолий Васильевич Торкунов Филипп Джессоп аатынан норуоттар икки ардыларынааҕы быраапка күрэххэ университет устудьуоннарын ситиһиилэрин бэлиэтээтэ. Аан дойдуга бастыҥнар ахсааннарыгар киирбит хамаанда састаабыгар Саха сириттэн икки кыыс баара — биһиги ыччаппыт улахан кыахтааҕын өссө биир туоһута.
Хас биирдии баттаммыт сөбүлэһии Саха сиригэр практическай суолталаах: экэниэмикэни сайыннарыыга, дьон олороругар табыгастаах усулуобуйаны тэрийиигэ, каадырдары бэлэмнээһиҥҥэ уонна өрөспүүбүлүкэ күрэстэһэр кыаҕын бөҕөргөтүүгэ туһуланар. Пуорум үлэтэ салҕанар», — диэн Ил Дархан суруйар.
Өрөспүүбүлүкэ нэһилиэнньэлээх пууннара массыына кыһыҥҥы суола аһыллыар диэри ирдэнэр кээмэйдээх оттук-энэргэтиическэй саппааһынан олоччу хааччылыннылар. Бу…
«Күн бүгүн эрэгийиэн иһинээҕи көтүүлэри үбүлээһин өрөспүүбүлүкэ бүддьүөтүн суотугар эрэ ыытыллар. Бу сыалга 250 мөлүйүөн…
Арассыыйаҕа массыына атыылаһарга чэпчэтиилээх кирэдьииттээһин хас даҕаны судаарыстыбаннай бырагыраама үлэлиир. Ону туһанан саҥа массыынаны атыылаһыахха…
Бу күннэргэ Горнай улууһун Бэрдьигэстээх сэлиэнньэтин ыччаттара нэһилиэк сэбиэтэ тэриллибит күнүн бэлиэтээтилэр. Бу туһунан Бэрдьигэстээх…
Сэтинньи 4-6 күннэригэр Дьокуускайга Сомоҕолоһуу күнүгэр аналлаах норуот уус-уран оҥоһуктарыгар босхо маастар-кылаастары ыытыахтара. Тэрээһини «Мин…
Өлүөнэ муостатын тутар былаһааккаҕа өрүс флотун муус туруон иннинээҕи үлэтэ түмүктэннэ. Ааспыт сезон устата 20-чэ…