Саха сиригэр «Артефакты. Культурный детектив» бырайыагынан документальнай киинэ уһуллулар

«Артефакты. Культурный детектив» бырайыак — бу Арассыыйа ааспыт уонна билиҥҥи кэминээҕи эрэгийиэннэри сырдатар документальнай киинэ буолар.

Бырайыак ыытааччыта Андрей Понкратов түмэллэргэ харалла сытар ураты көстүүлээх уонна сэдэх эспэнээттэри кытта билсиһиннэрэр. Документальнай киинэ саҥа онус сезонун уһула устар бөлөх Саха сиригэр сырытта. Манна Национальнай уус-уран түмэлин дириэктэрэ уонна худуоһунньуктар Туйаара уонна Екатерина Шапошниковалары, Мария Лукинаны кытта устар бөлөх саха ускуустубатын үөрэттилэр, олохтоох үһүйээннэри уонна номохтору биллилэр, олоҥхоһуттары  кытта билистилэр.

«Омоҕой дьиэтэ» диэн хартыына бүтүн аан дойдуну сирэйдиир дуо? Түҥ былыргы кымыс утаҕа тугунан уратылааҕый? Бастакы ыһыаҕы ким тэрийбитэй? Бу уонна да атын ыйытыктарга саҥа хартыына иһинэн хоруйдуохтара.

«Артефакты. Культурный детектив» бырайыак иһинэн «Былыргы Саха сирин үһүйээннэрэ» документальнай киинэ бу сыл алтынньы 18 күнүгэр Okko онлайн киинэ тыйаатырыгар, оттон алтынньы 19 күнүгэр «Моя Планета» ханаалга күөх экрааҥҥа тахсыаҕа. «Артефакты. Культурный детектив» бырайыак  «Култуура» нацбырайыак,«Моя Планета» ханаал,  ЕМГ устуудьуйа уонна Okko онлайн киинэ тыйаатырын холбоһуктаах көҕүлээһиннэрэ.